மதுபோதையில் மாமரத்தில் மாங்காய் பறிக்க ஏறி தையல் தொழிலாளி கிணற்றில் விழுந்து உயிரிழந்த சம்பவம் சோகத்தை ஏற்படுத்தியது .
திருவண்ணாமலை மாவட்டம் பண்டிதபட்டு பகுதியை சேர்ந்த சுரேஷ் என்பவர் தையல் தொழில் செய்து வருகிறார். இவர் மதுபோதையில்அய்யம்பாளையம் கிராமத்தில் உள்ள விவசாய நிலத்தில் இருந்த மாமரத்தில் மாங்காய் பறிப்பதற்காக மரத்தில் ஏறியதாக கூறப்படுகிறது. அப்போது அவர் மதுபோதையில் இருந்ததால் மரத்திலிருந்து தவறி கீழே இருந்த கிணற்றில் விழுந்தார். இதைக்கண்ட அக்கம்பக்கத்தினர் திருவண்ணாமலை தாலுகா போலீசாருக்கு தகவல் அளித்தனர்.
இதுகுறித்து தகவல் அறிந்த தீயணைப்பு படை வீரர்கள் சம்பவ இடத்திற்கு விரைந்து சென்று கிணற்றில் விழுந்த சுரேசை பிணமாக மீட்டனர். இதையடுத்து அவரது உடலை போலீசார் உடற்கூறு ஆய்வுக்காக திருவண்ணாமலை அரசு மருத்துவமனைக்கு அனுப்பி வைத்தனர் . இதுதொடர்பாக திருவண்ணாமலை தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.