மூதாட்டியிடம் 7 பவுன் தங்க சங்கிலியை பறித்துகொண்டு தப்பிச்சென்ற இரண்டு மர்ம நபர்களை காவல்துறையினர் வலைவீசி தேடி வருகின்றனர்.
மதுரை மாவட்டத்திலுள்ள ஆண்டிப்பட்டி கிராமத்தில் வெங்கடசாமி-ராஜலட்சுமி என்ற வயது முதிர்ந்த தம்பதியர் வசித்து வருகின்றனர். இந்நிலையில் ராஜலட்சுமி நேற்று அதிகாலை தனது வீட்டு வாசலில் கோலம் போட்டு கொண்டிருந்தார். அந்த சமயத்தில் இரண்டு மர்மநபர்கள் ஒரு இருசக்கர வாகனத்தில் அந்தப் பகுதியில் சுற்றிக் கொண்டிருந்தனர்.
அவர்களில் ஒருவர் மட்டும் இருசக்கர வாகனத்தில் இருந்து கீழே இறங்கி ராஜலட்சுமியின் அருகில் சென்றுள்ளார். இதனையடுத்து அந்த மர்மநபர் ராஜலட்சுமி சுதாரிப்பதற்குள் அவர் கழுத்தில் அணிந்திருந்த 7 பவுன் தங்கச் சங்கிலியை பறித்துக் கொண்டு இருசக்கர வாகனத்தில் ஏறி தப்பி சென்றுள்ளார். அதன்பின் அதிர்ச்சியிலிருந்து மீண்ட ராஜலட்சுமி திருடன் திருடன் என கூச்சலிட்டுள்ளார்.
ஆனால் அக்கம்பக்கத்தினர் வருவதற்குள் இருசக்கர வாகனத்தில் மர்மநபர்கள் மின்னல் வேகத்தில் தப்பிச் சென்று விட்டனர். இதுகுறித்து ராஜலட்சுமி வாடிப்பட்டி காவல் நிலையத்தில் புகார் அளித்துள்ளார். இந்த புகாரின் பேரில் வழக்குப்பதிவு செய்த காவல்துறையினர் நகையை பறித்துக் கொண்டு இருசக்கர வாகனத்தில் தப்பிச் சென்ற மர்ம நபர்களை தீவிரமாக தேடி வருகின்றனர்.