கந்து வட்டி தொல்லையால் விவசாயி விஷம் குடித்து தற்கொலை செய்து கொண்ட சம்பவம் சோகத்தை ஏற்படுத்தியுள்ளது
திருவண்ணாமலையில் உள்ள சின்னபாலியப்பட்டு பகுதியில் ராமஜெயம் என்பவர் வசித்து வந்துள்ளார். இவர் விவசாயம் செய்து வந்துள்ளார். இவருக்கு மனைவியும் இரண்டு மகன்களும் இருக்கின்றனர். இந்நிலையில் ராமஜெயம் தனது வீட்டு வறுமை காரணமாக கோட்டாங்கல் பகுதியில் வசிக்கும் ஒரு கந்துவட்டி காரரிடம் கடந்த 2018 -ஆம் வருடம் கடனாக 1 லட்சம் ரூபாய் வாங்கியுள்ளார். இதனை அடுத்து ராமஜெயம் வட்டி பணத்தை மாதந்தோறும் 15000 ரூபாய் தவறாமல் கட்டி வந்துள்ள நிலையில் அவருக்கு திடீரென வட்டி பணத்தை கட்ட முடியாத சூழ்நிலை ஏற்பட்டுள்ளது.
இதனால் கடன் மேலும் மேலும் அதிகரித்துள்ளது. இதனைதொடர்ந்து கந்து வட்டிகாரர் ராமஜெயத்தை வட்டி பணத்தை கேட்டு மிரட்டியது மட்டுமல்லாமல் அவருடைய 95 சென்ட் நிலத்தை எழுதி வாங்கிவிட்டார். இதனால் மன உளைச்சலுக்கு ஆளான ராமஜெயம் தனது வீட்டில் விஷம் குடித்து தற்கொலை செய்து கொண்டுள்ளார். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று ராமஜெயத்தின் உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர்.
இதற்கிடையில் ராமஜெயத்தின் உறவினர்கள் கடன் கொடுத்த நபரிடம் சென்று பத்திரத்தை திருப்பி தரும்படி கேட்டுள்ளனர். பின்னர் கடன் கொடுத்த நபரும் கிரையம் செய்து கொண்ட பத்திரத்தை தந்து விடுவதாக உறவினரிடம் கூறியுள்ளார். ஆனால் கடன் கொடுத்த நபர் சொன்னபடி பத்திரத்தை திருப்பி தராததால் ஏமாற்றமடைந்த உறவினர்கள் ராமஜெயத்தின் உடலை வைத்து செங்கம் பைபாஸ் ரோட்டில் திடீரென போராட்டத்தில் ஈடுபட்டுள்ளனர்.
இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று போராட்டத்தில் ஈடுபட்ட ராமஜெயத்தின் உறவினர்களுடன் பேச்சுவார்த்தை நடத்தியுள்ளனர். அப்போது காவல்துறையினர் சம்பந்தப்பட்ட நபர் மீது உரிய நடவடிக்கை எடுக்கப்படும் என உறுதியளித்ததை அடுத்து போராட்டத்தில் ஈடுபட்ட உறவினர்கள் அங்கிருந்து கலைந்து சென்றுள்ளனர். இந்த போராட்டத்தினால் அப்பகுதியில் சிறிது நேரம் போக்குவரத்து நெரிசல் ஏற்பட்டுள்ளது. மேலும் இதுகுறித்து வழக்கு பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.