தமிழகம் முழுவதும் கொரோனா பரவலை கட்டுப்படுத்த முழு ஊரடங்கு அமல்படுத்தப்பட்டு வருகின்றது. இதனால் தொற்று பாதிப்பு குறைந்து வருகிறது. அடுத்தடுத்து நீட்டிக்கப்பட்டு வரும் ஊரடங்கில் பாதிப்பு அதிகமுள்ள 11 மாவட்டங்களில் ஒரு சில தளர்வுகளும் எஞ்சிய மாவட்டங்களில் கூடுதல் தளர்வுகளும் வழங்கப்பட்டன. இதனையடுத்து இன்றுடன் ஊரடங்கு முடிவடைய இருந்த நிலையில் மேலும் ஜூலை-5 வரை தளர்வுகளுடன் கூடிய ஊரடங்கு நீட்டிக்கப்பட்டுள்ளது.
அதன்படி இன்று காலை 6 மணி முதல் புதிய தளர்வுகளுடன் கூடிய ஊரடங்கு அமலுக்கு வந்தது. இதில் தொற்று குறையாத கோவை, நீலகிரி, திருப்பூர், ஈரோடு, சேலம், கரூர், நாமக்கல், தஞ்சை, நாகை, திருவாரூர், மயிலாடுதுறை ஆகிய 11 மாவட்டங்களில் புதிய தளர்வுகள் வழங்கப்பட்டுள்ளன. மேலும் மற்ற மாவட்டங்களிலும் கூடுதல் தளர்வுகள் அளிக்கப்பட்டுள்ளன.
இதில் ஏற்கனவே 4 மாவட்டங்களுக்கு பேருந்து சேவை அனுமதிக்கப்பட்ட நிலையில் கூடுதலாக 23 மாவட்டங்களில் பேருந்து சேவைக்கு அனுமதியளிக்கப்பட்டுள்ளது. இந்நிலையில் கொரோனா இன்று முதல் 27 மாவட்டங்களில் 9,333 பேருந்துகள் இயக்கப்படும் என்று தெரிவிக்கப்பட்டுள்ளது. மேலும் பயணிகளின் தேவைக்கு ஏற்ப கூடுதல் பேருந்துகள் இயக்க ஏற்பாடு செய்யப்பட்டுள்ளது என்றும் இயக்கப்படும் பேருந்துகளில் உரிய முறையில் கிருமி நாசினி கொண்டு சுத்தம் செய்து அரசு விதித்துள்ள நெறிமுறைகளை பின்பற்றி இயக்கவும் உத்தரவிடபட்டுள்ளது.