தமிழகம் முழுவதும் கொரோனா பரவலை கட்டுப்படுத்த முழு ஊரடங்கு அமல்படுத்தப்பட்டு வருகின்றது. அடுத்தடுத்து நீட்டிக்கப்பட்டு வரும் ஊரடங்கினால் தொற்று பாதிப்பு குறைந்து வருகிறது. எனவே ஊரடங்கை ஜூன்-28 ஆம் தேதி வரை நீட்டிக்கப்பட்டிருந்தது. அதில் பாதிப்பு அதிகமுள்ள 11 மாவட்டங்களில் ஒரு சில தளர்வுகளும் எஞ்சிய மாவட்டங்களில் கூடுதல் தளர்வுகளும் வழங்கப்பட்டன. இதனையடுத்து மேலும் ஜூலை-5 வரை தளர்வுகளுடன் கூடிய ஊரடங்கு நீட்டிக்கப்பட்டுள்ளது.
இந்நிலையில் இன்று முதல் ஏற்கனவே அனுமதிக்கப்பட்ட 4 மாவட்டங்களுடன், கூடுதலாக 23 மாவட்டங்களில் பேருந்து சேவைக்கு அனுமதியளித்து முதல்வர் ஸ்டாலின் உத்தரவிட்டுள்ளார். இதனைத்தொடர்ந்து 27 மாவட்டங்களில் பயணிக்க ஏதுவாக 9,333 பேருந்துகள் இயக்கப்படுவதாக போக்குவரத்துத்துறை தெரிவித்துள்ளது.
இதனையடுத்து திருச்சி -கரூர் வழித்தடத்தில் பெட்டவாய்த்தலை வரையும், திருச்சி- சேலம் வழித்தடத்தில் தொட்டியம் மேக்கல் நாயக்கன்பட்டி வரையும், திருச்சி- தஞ்சாவூர் வழித்தடத்தில் வாழவந்தான் கோட்டை வரையும், துறையூர் – நாமக்கல் வழித்தடத்தில் பவித்திரம் வரையும், அரியலூர் – தஞ்சாவூர் வழித்தடத்தில் திருமானூர் வரையும், ஜெயம்கொண்டம்- கும்பகோணம் வழித்தடத்தில் அணைக்கரை வரையும் பேருந்துகள் இயக்கப்படும் என்று அறிவிக்கப்பட்டுள்ளது.