அனுமதி இல்லாமல் மணல் கடத்திய ஒருவரை காவல்துறையினர் கைது செய்ததோடு தப்பிச் சென்ற மூன்று பேரை வலை வீசி தேடி வருகின்றனர்.
தூத்துக்குடி மாவட்டத்தில் உள்ள தாமிரபரணி ஆற்றுப் பகுதியிலிருந்து தடையை மீறி, மணல் கடத்தப்படுவதாக காவல் துறையினருக்கு ரகசிய தகவல் கிடைத்துள்ளது. அந்தத் தகவலின் படி காவல்துறையினர் அப்பகுதியில் ரோந்து பணியில் ஈடுபட்டுள்ளனர். அப்போது அப்பகுதியில் 4 பேர் இணைந்து சாக்கு மூட்டையில் மணல் அள்ளிக் கொண்டிருந்தனர். இந்நிலையில் நான்கு நபர்களும் காவல்துறையினரை பார்த்தவுடன் அங்கிருந்து அடித்து பிடித்து தப்பித்து ஓடி உள்ளனர்.
அவ்வாறு தப்பி ஓடிய நபர்களில் ஒருவரை மட்டும் காவல்துறையினர் மடக்கி பிடித்து விட்டனர். அதன் பிறகு காவல்துறையினர் அவரிடம் நடத்திய விசாரணையில் அவர் மறந்தலைப் பகுதியில் வசிக்கும் அந்தோணி என்பது தெரியவந்துள்ளது. இதனையடுத்து காவல்துறையினர் அந்தோணி அள்ளிய 10 சாக்கு மூட்டை மணல்களை பறிமுதல் செய்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் அனுமதி இல்லாமல் மணல் கடத்திய குற்றத்திற்காக அந்தோணியை கைது செய்து விசாரணை நடத்தி வருகின்றனர். மேலும் மணல் கடத்தி தப்பிச் சென்ற மூன்று பேரை காவல்துறையினர் வலை வீசி தேடி வருகின்றனர்.