தேனி மாவட்டத்தில் மர்மநபர்கள் சிலர் டாஸ்மார்க்கின் பூட்டை உடைத்து மது பாட்டில்களை திருடி சென்ற சம்பவம் பரபரப்பை ஏற்படுத்தியுள்ளது.
தேனி மாவட்டம் கம்பத்தில் உள்ள புதிய பேருந்து நிலையம் அருகில் டாஸ்மார்க் கடை ஓன்று செயல்பட்டு வருகின்றது. இந்த கடையின் மேற்பார்வையாளராக கம்பத்தை சேர்ந்த வெங்கடேஷ் என்பவர் பணிபுரிந்து வருகின்றார். இந்நிலையில் நேற்று முன்தினம் வழக்கம் போல விற்பனை முடித்ததும் வெங்கடேஷ் கடையை பூட்டிவிட்டு வீட்டிற்கு சென்றுள்ளார். இதனையடுத்து நேற்று காலையில் கடையின் பூட்டு உடைக்கப்பட்டு இருந்துள்ளது. இதனை பார்த்த அப்பகுதி வழியாக சென்றவர்கள் காவல்துறையினருக்கும், கடையின் மேற்பார்வையாளருக்கும் தகவல் தெரிவித்துள்ளனர்.
தகவலறிந்து வந்த வெங்கடேஷ் கடைக்குள் சென்று பார்த்தபோது உள்ளே இருந்த 24 மதுபாட்டில்கள் கொண்ட பெட்டி திருடு போய் இருந்துள்ளது. இதனை தொடர்ந்து காவல்துறையினர் சம்பவ இடத்திற்கு சென்று நடத்திய விசாரணையில் டாஸ்மாக் கடைக்கு அருகில் உள்ள ஒரு புதரில் 16 மதுபாட்டில்கள் கொண்ட அட்டை பெட்டி கிடந்துள்ளது. அதனை பறிமுதல் செய்து கடையின் ஊழியர்களிடம் ஒப்படைத்துள்ளனர். மேலும் இச்சம்பவம் குறித்து வழக்குப்பதிவு செய்து கடையில் உள்ள சிசிடிவி கேமராவில் பதிவான காட்சிகளை வைத்து திருடிய மர்மநபர்கள் குறித்து விசாரணை மேற்கொண்டு வருகின்றனர்.