சென்னை ஐஐடி வளாகத்தில் உள்ள ஹாக்கி மைதானத்தில் கேரளாவைச் சேர்ந்த கௌரவ விரிவுரையாளர் மர்மமான முறையில் எரிந்த நிலையில் உடல் மீட்கப்பட்டுள்ளது. இதையடுத்து அவர் தற்கொலை செய்து கொண்டாரா அல்லது யாரேனும் எரித்து கொலை செய்தார்களா என்ற கோணாத்தில் போலீசார் விசாரணை நடத்திவருகின்றனர். சென்னை கிண்டியில் உள்ள சென்னை ஐஐடியில் நாடு முழுவதும் ஆயிரத்திற்கும் மேற்பட்ட மாணவர்கள் தங்கி படித்து வருகின்றனர். இந்தநிலையில் கேரளாவைச் சேர்ந்த உன்னிகிருஷ்ணன் நாயர் என்ற எலக்ட்ரிக்கல் பாடப்பிரிவு திட்ட கௌரவ விரிவுரையாளராக பணியாற்றி வந்தார். இவர் சென்னை ஐஐடி வளாகத்தில் உள்ள விடுதியில் தங்கி பணியாற்றி வந்தார். நேற்று மாலை விடுதியில் இருந்த உன்னிகிருஷ்ணன் திடீரென மாயமானார்.
இதற்கிடையே ஐஐடி வளாகத்தில் உள்ள ஹாக்கி மைதானம் அருகே எரிந்து கரிக்கட்டையான நிலையில் உன்னிகிருஷ்ணன் சடலமாக கிடந்தது தெரியவந்தது. அதைப்பார்த்து அதிர்ச்சியடைந்த மாணவர்கள் சம்பவம் குறித்து ஐஐடி நிர்வாகத்திற்கு தகவல் அளித்தனர். அந்த தகவலின் அடிப்படையில் ஐஐடி நிர்வாகம் கோட்டூர்புரம் போலீசாருக்கு தகவல் தெரிவித்தனர். அதன்படி கோட்டூர்புரம் போலீசார் சம்பவ இடத்திற்கு விரைந்து சென்று எரிந்த நிலையில் இறந்து கிடந்த உன்னிக்கிருஷ்ணன் உடலை கைப்பற்றி பிரேத பரிசோதனைக்காக சென்னை ராயப்பேட்டை அரசு மருத்துவமனைக்கு அனுப்பி வைத்தனர்.
இந்த சம்பவம் குறித்து போலீசார் உன்னிகிருஷ்ணனுடன் விடுதியில் தங்கி இருந்தவர்கள் மற்றும் ஐஐடி நிர்வாகிகளிடம் விசாரணை நடத்தி வருகின்றனர். இதற்கிடையே உயிரிழந்த உன்னிகிருஷ்ணன் பயன்படுத்திய மடிக்கணினி, செல்போனை போலீசார் கைப்பற்றி விசாரணை நடத்தி வருகின்றனர். ஐஐடி வளாகத்தில் மர்மமான மரணங்கள் தொடர்ந்து வருவதால் மாணவர்களும் பெற்றோர்களும் அச்சத்தில் உள்ளனர்.
டேக்ஸ் :டிரெண்டிங்குற்றம்லோக்கல்
சப்ஸ்கிரைப்