மோட்டார் சைக்கிள் மீது டிப்பர் லாரி மோதிய விபத்தில் புதுமாப்பிள்ளை உயிரிழந்த சம்பவம் சோகத்தை ஏற்படுத்தியுள்ளது.
திருச்சி மாவட்டத்தில் உள்ள ஆண்டார் வீதி தெப்பகுளம் பகுதியில் பன்னீர்செல்வம் என்பவர் வசித்து வருகிறார். இவருக்கு மாதவன் என்ற மகன் இருந்துள்ளார். கடந்த 4 மாதங்களுக்கு முன்பு மாதவனுக்கு கவிதா என்ற பெண்ணுடன் திருமணம் நடைபெற்றுள்ளது. இந்நிலையில் மாதவன் வேலைக்கு செல்வதற்காக மோட்டார் சைக்கிளில் திருச்சியை நோக்கி புறப்பட்டுள்ளார். இதனையடுத்து காளியம்மன் கோவில் அருகே சென்று கொண்டிருந்த போது எதிர்பாராதவிதமாக இவரின் மோட்டார் சைக்கிள் மீது அவ்வழியாக வேகமாக வந்த டிப்பர் லாரி மோதி விட்டது.
இந்த விபத்தில் படுகாயம் அடைந்த அவர் சம்பவ இடத்திலேயே பரிதாபமாக இறந்து விட்டார். இதுகுறித்து தகவல் அறிந்த காவல்துறையினர் அங்கு விரைந்து சென்று மாதவனின் உடலை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் விபத்தை ஏற்படுத்திய லாரி டிரைவரை கைது செய்து விசாரணை மேற்கொண்டு வருகின்றனர்.