அரசு அதிகாரியின் வீட்டில் பணம் மற்றும் தங்க நகைகளை மர்ம நபர்கள் திருடிச் சென்ற சம்பவம் பரபரப்பை ஏற்படுத்தியுள்ளது.
மதுரை மாவட்டத்திலுள்ள எஸ். ஆலங்குளம் பகுதியில் சிதம்பரம் என்பவர் தனது குடும்பத்துடன் வசித்து வருகின்றார். இவர் தமிழ்நாடு குடிநீர் வடிகால் வாரியத்தில் அதிகாரியாக பணியாற்றி தற்போது ஓய்வு பெற்றுள்ளார். இந்நிலையில் சிதம்பரம் புதுக்கோட்டையில் வசிக்கும் தனது தாயை பார்ப்பதற்கு குடும்பத்துடன் சென்று விட்டு திரும்ப வீட்டிற்கு புறப்பட்டு உள்ளார். இதனையடுத்து சிதம்பரம் வீட்டிற்கு சென்ற போது அங்கு பின்பகுதியில் உள்ள கதவு உடைக்கப்பட்டு இருந்ததைக் கண்டு உள்ளே சென்று பார்த்துள்ளார்.
அப்போது அங்கு பீரோவில் இருந்த பொருட்கள் எல்லாம் கீழே தள்ளிவிட்டு அதிலிருந்த 20,000 பணம் மற்றும் 20 பவுன் தங்க நகைகளை மர்ம நபர்கள் திருடி சென்றதை கண்டு அதிர்ச்சி அடைந்துள்ளார். இதுகுறித்து சிதம்பரம் உடனடியாக காவல் நிலையத்திற்கு தகவல் கொடுத்துள்ளார். அந்த தகவலின் படி காவல்துறையினர் மற்றும் தடவியல் நிபுணர்கள் சம்பவ இடத்திற்கு விரைந்து சென்று அங்கு தடயங்களை சேகரித்துள்ளனர். மேலும் இச்சம்பவம் குறித்து வழக்கு பதிவு செய்த காவல்துறையினர் அப்பகுதியில் பொருத்தப்பட்டிருந்த கண்காணிப்பு கேமராவில் பதிவான காட்சிகளை வைத்து தங்க நகைகள் மற்றும் பணத்தை திருடிச் சென்ற மர்ம நபர்களை வலை வீசி தேடி வருகின்றனர்.