“இளம்பெண் சுபஸ்ரீ மரணம்” அதிமுக பேனர் வைத்த முன்னாள் கவுன்சிலர் மீது வழக்குப்பதிவு..!!

இளம்பெண் உயிரிழப்புக்கு காரணமான பேனரை வைத்த முன்னாள் கவுன்சிலர் ஜெயகோபால் மீது பள்ளிக்கரணை போலீஸார் வழக்குப்பதிவு செய்துள்ளனர். 

சென்னை குரோம்பேட்டையை  சேர்ந்தவர்  இளம்பெண் சுபஸ்ரீ (வயது 23). வீட்டிற்கு ஒரே செல்லப்பிள்ளையான இவர் ஒரு பொறியியல் பட்டதாரி. கந்தன்சாவடியில் உள்ள தனியார் நிறுவனத்தில் வேலை பார்த்து வரும் இவர் பணி முடிந்து   பள்ளிக்கரணை வழியாக சாலையில் தனது பைக்கில் சென்று கொண்டிருந்தார். அப்போது சாலையின் நடுவில் திருமணத்திற்காக வைக்கப்பட்டிருந்த அதிமுக பேனர்களில் ஒன்று சுபஸ்ரீ மீது விழுந்துள்ளது. இதனை எதிர்பார்க்காத  சுபஸ்ரீ சாலையில் தூக்கி வீசப்பட்டார். அந்த நேரத்தில் பின்னால் வந்த தண்ணீர் லாரி ஒன்று அவர் மீது ஏறியதில் பரிதாபமாக உயிரிழந்தார்.

அதன்பின் சம்பவ இடத்திற்கு வந்த போலீசார் அவரது உடலை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். ஒருபாவமும் அறியாத சுபஸ்ரீ பேனரால் பலியானது அப்பகுதியில் சோகத்தை ஏற்படுத்தியுள்ளது. இவர்  மறைவுக்கு முக ஸ்டாலின் கண்டனம் தெரிவித்திருந்தார். அந்த இடத்தில் பேனர் வைப்பதற்கு முறையாக அனுமதி பெறாததால் விபத்து ஏற்பட்டதும் அவசர அவசரமாக அங்கிருந்த பேனர்கள் அகற்றப்பட்டன. அதன்பின் லாரி ஓட்டுநர் மனோஜ் கைது செய்யப்பட்டார்.