அரசு பேருந்தில் முகக்கவசம் அணியாமல் வந்த பயணிகளுக்கு கொரோனா பரிசோதனை செய்துள்ளனர்.
சேலம் மாவட்டத்திலுள்ள மாவட்ட ஆட்சியர் அலுவலகம் முன்பு காவல்துறையினர் தீவிர வாகன சோதனையில் ஈடுபட்டுள்ளனர். அப்போது அந்த வழியாக அதிக பயணிகளை ஏற்றி வந்த அரசு பேருந்தை காவல்துறையினர் தடுத்து நிறுத்தினர். அதன்பின்னர் சுகாதாரத்துறை ஊழியர்கள், மாநகராட்சி பணியாளர்கள் மற்றும் காவல்துறையினர் ஆகியோர் அந்த பேருந்தில் முகக்கவசம் அணியாமலும், சமூக இடைவெளியை கடைபிடிக்காமலும் வந்த பயணிகளை பேருந்தை விட்டு கீழே இறங்க செய்தனர். அதன்பின் அந்த பயணிகளுக்கு காவல்துறையினர் கொரோனா பரிசோதனை செய்தனர். ஆனால் சில பயணிகள் இதற்கு எதிர்ப்பு தெரிவித்து காவல்துறையினரிடம் வாக்குவாதத்தில் ஈடுபட்டனர்.
இதுகுறித்து காவல்துறையினர் அந்த பயணிகளிடம் முகக்கவசம் அணியாமலும், சமூக இடைவெளியை கடை பிடிக்காமலும் யாரும் பேருந்தில் பயணம் செய்யக்கூடாது எனவும், அப்படி செய்தால் சட்டப்படி நடவடிக்கை எடுக்கப்படும் எனவும் கூறியுள்ளனர். மேலும் பேருந்து ஓட்டுனர் மற்றும் நடத்துனர் ஆகிய இருவரிடம் அதிக பயணிகளை ஏற்றி பயணம் செய்ய கூடாது என அறிவுறுத்தினர். மேலும் அதிகமாக பயணிகள் பயணம் செய்வதால் தான் பரிசோதனை செய்ய வேண்டிய நிலை ஏற்பட்டுள்ளதாக சுகாதாரத்துறையினர் தெரிவித்துள்ளனர். இதனால் அப்பகுதியில் சிறிது நேரம் பரபரப்பு ஏற்பட்டுள்ளது.