செலவுக்கு பணம் கொடுக்காததால் மருமகனே தாய் மாமாவை கழுத்தை நெரித்து கொலை செய்யப்பட்ட சம்பவம் பரபரப்பை ஏற்படுத்தியுள்ளது.
கன்னியாகுமரி மாவட்டத்திலுள்ள நாகர்கோவில் சாந்தன் செட்டிவிளை பெரியநாடார் தெருவில் சிவதாணு என்பவர் வசித்து வந்துள்ளார். இவர் ஓய்வு பெற்ற தாசில்தாராக இருந்துள்ளார். இவருடைய மனைவி இறந்து விட்டார். இவருடைய மகள் நாமக்கலில் குடும்பத்துடன் வசித்து வருகின்றார். ஆகவே வீட்டில் சிவதாணு, அவருடைய தங்கை மகன் விக்னேஷ் ராம் என்பவருடன் வாழ்ந்து வந்துள்ளார். இதில் விக்னேஷ் ராமுக்கு இன்னும் திருமணம் நடைபெறவில்லை. இவர் அடிக்கடி வீட்டிலிருந்து வெளியேறி எங்கேயாவது செல்வதை வழக்கமாக வைத்துள்ளார். அதன்படி கடந்த 4 மாதங்களுக்கு முன்பு விக்னேஷ் ராம் திடீரென வீட்டில் இருந்து காணாமல் போய்விட்டார்.
அவரை உறவினர்கள் பல்வேறு இடங்களிலும் தேடி கண்டுபிடிக்க முடியாததால் காவல் நிலையத்தில் புகார் கொடுத்துள்ளனர். அந்த புகாரின்படி காவல்துறையினர் விசாரணை நடத்தியது விக்னேஷ் ராம் கோவைக்கு சென்றது தெரியவந்தது. இதனையடுத்து விக்னேஷ் ராமை கோவையிலிருந்து காவல் துறையினர் மீட்டு பின் தனது தாய்மாமா சிவதாணு வீட்டில் ஒப்படைத்தனர். இந்நிலையில் விக்னேஷ் ராம் தனக்கு செலவுக்கு பணம் வேண்டும் என சிவதாணுவிடம் கேட்டுள்ளார். ஆனால் அவர் பணம் கொடுக்க மறுத்துவிட்டார். இதனால் விக்னேஷ் ராம் எவ்வளவு வலியுறுத்தியும் பணம் கொடுக்காததால் சிவதாணு மீது கோபமடைந்து திடீரென அவரை காலால் மார்பில் மிதித்து கீழே தள்ளியதாக தெரிகின்றது. மேலும் விக்னேஷ் ராம் சிவதாணுவை கழுத்தை நெறித்ததால் அவர் சம்பவ இடத்திலேயே பரிதாபமாக உயிரிழந்து விட்டார்.
இதனைத்தொடர்ந்து என்ன செய்வது என்று தெரியாமல் விக்னேஷ் ராம் மாமாவை கொன்றுவிட்ட தகவலை அனாதை மடம் பகுதியில் வசித்து வரும் தன்னுடைய தாயாருக்கு செல்போன் மூலம் தெரிவித்துள்ளார். இதனால் அதிர்ச்சியடைந்த விக்னேஷ் ராம் தாய் வீட்டிற்கு வந்து கதறி அழுதுள்ளார். இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று சிவதாணுவின் சடலத்தை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இவ்வாறு செலவுக்கு பணம் கொடுக்காததால் தன் தாய் மாமாவையே விக்னேஷ் ராம் கொலை செய்த சம்பவம் பரபரப்பை ஏற்படுத்தியுள்ளது. மேலும் இதுகுறித்து காவல்துறையினர் வழக்குப் பதிவுசெய்து விக்னேஷ் ராமை கைது செய்தனர்.