மாடியிலிருந்து தவறி விழுந்த வியாபாரி பரிதாபமாக உயிரிழந்த சம்பவம் பரபரப்பை ஏற்படுத்தியுள்ளது.
தஞ்சாவூர் மாவட்டத்திலுள்ள திருவிடைமருதூர் பகுதியில் வியாபாரியான சாகுல்ஹமீது மற்றும் லியாகத் அலி என்ற இரு நண்பர்கள் வசித்து வருகின்றனர். இவர்கள் இருவரும் பட்டுக்கோட்டை பகுதியில் ஒரு தனியார் விடுதியில் அறை எடுத்து தங்கியிருந்தனர். இந்நிலையில் 2 – வது மாடியின் கைப்பிடிச் சுவரில் அமர்ந்து சாகுல்ஹமீது காற்று வாங்கிக் கொண்டிருந்தார். அப்போது அவர் விடுதி மாடியில் இருந்து எதிர்பாராதவிதமாக தவறி கீழே விழுந்தார்.
இதனால் பலத்த காயமடைந்த சாகுல் ஹமீது சம்பவ இடத்திலேயே பரிதாபமாக உயிரிழந்து விட்டார். இதுகுறித்து லியாகத் அலி பட்டுக்கோட்டை நகர காவல் துறையினருக்கு தகவல் தெரிவித்துள்ளார். அந்த தகவலின் படி சம்பவ இடத்திற்கு விரைந்து சென்ற காவல்துறையினர் சாகுல்ஹமீதின் சடலத்தை கைப்பற்றி பட்டுக்கோட்டை அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்கு பதிவு செய்த காவல்துறையினர் விசாரணை மேற்கொண்டு வருகின்றனர்.