காரானது நிலை தடுமாறி தடுப்பு சுவரில் மோதி விபத்தில் 2 பேர் பலியாகி 6 பேர் படுகாயம் அடைந்த சம்பவம் சோகத்தை ஏற்படுத்தியுள்ளது.
சிவகங்கை மாவட்டத்திலுள்ள காரைக்குடி பகுதியில் ஹரி கிருஷ்ணன் என்பவர் தனது குடும்பத்துடன் வசித்து வருகின்றார். இவருக்கு திவ்யபாரதி என்ற மனைவி உள்ளார். இந்த தம்பதிகளுக்கு இரண்டு வயதுடைய கிருபாளினி என்ற பெண் குழந்தை இருக்கின்றார். இந்நிலையில் ஹரிகிருஷ்ணன் தூத்துக்குடி மாவட்டத்திலுள்ள திருச்செந்தூர் முருகன் கோவிலுக்கு செல்வதற்காக தனது தாத்தாவான கணபதி, மனைவி, மகள், தாயான சீதா, உறவினரான காளியம்மாள் மற்றும் ஹரி கிருஷ்ணனின் நண்பரான விக்கி என்பவருடன் இணைந்து காரில் வெங்கடேசன் என்பவர் ஓட்டிக் கொண்டு சென்றுள்ளார்.
இதனையடுத்து ஹரிகிருஷ்ணன் தனது குடும்பத்துடன் திருச்செந்தூருக்கு சென்றபோது கோவிலுக்குள் கொரோனா தொற்றினால் பக்தர்கள் செல்ல அனுமதி இல்லாததால் அவர்கள் திரும்ப வீட்டிற்கு புறப்பட்டுள்ளனர். அப்போது காரின் முன் பகுதியில் தாத்தாவான கணபதி மற்றும் நண்பரான விக்கி ஆகியோர் அமர்ந்து தூத்துக்குடி மாவட்டத்திலுள்ள அரசங்குளம் பகுதியில் சென்று கொண்டிருந்தார். இந்நிலையில் அவர்கள் சென்று கொண்டிருந்த காரானது திடீரென நிலைதடுமாறி கட்டுப்பாட்டை இழந்து வேகமாக சென்று அங்குள்ள தடுப்பு சுவரில் மீது மோதி விட்டது. இந்த விபத்தில் காரின் முன்பகுதி அப்பளம் போல் நொறுங்கியதால் முன்பகுதியில் அமர்ந்திருந்த கணபதி மற்றும் விக்கி ஆகியோர் பலத்த காயம் அடைந்து சம்பவ இடத்திலேயே பரிதாபமாக உயிரிழந்து விட்டனர்.
இதில் சென்ற மற்ற ஆறு பேரும் படுகாயம் அடைந்து வெளியே வர முடியாமல் இடிபாடுகளில் சிக்கி தவித்துக் கொண்டிருந்தனர். இதனை பார்த்த அருகில் இருந்தவர்கள் அதிர்ச்சி அடைந்து உடனடியாக காவல் நிலையத்திற்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் படுகாயமடைந்து காரின் இடிபாடுகளில் சிக்கி தவித்த 6 பேரையும் உடனடியாக மீட்டு சிகிச்சைக்காக அரசு மருத்துவமனைக்கு அனுப்பி வைத்துள்ளனர்.அங்கு அவர்களுக்கு தீவிர சிகிக்சை அளித்து வருகின்றனர். இதனையடுத்து விபத்தில் உயிரிழந்த கணபதி மற்றும் விக்கியின் உடலை கைப்பற்றி உடற்கூறு ஆய்வுக்காக அரசு மருத்துவமனைக்கு அனுப்பி வைத்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.