நாடு முழுவதும் கொரோனா அச்சுறுத்தல் காரணமாக பள்ளி மற்றும் கல்லூரிகள் அனைத்தும் மூடப்பட்டுள்ளன. பெரும்பாலான மாநிலங்களில் அனைத்து வகுப்பு மாணவர்களும் தேர்ச்சி என அறிவிக்கப்பட்டுள்ளது. தற்போது அடுத்த கல்வியாண்டு தொடங்கி விட்டதால் மாணவர் சேர்க்கை நடந்து கொண்டிருக்கிறது. இந்த கல்வியாண்டு ஆன்லைன் மூலமாகவே நடத்தப் படுமா அல்லது பள்ளிகள் திறக்கப் படுமா என்று மாணவர்கள் மத்தியிலும் பெற்றோர்கள் மத்தியிலும் கேள்வி எழுந்துள்ளது. பெரும்பாலான மாநிலங்களில் கொரோனா பாதிப்பு கணிசமாக குறைந்து கொண்டே வருவதால், பள்ளிகள் திறப்பு குறித்து ஆலோசிக்கப்பட்டு வருகிறது.
இந்நிலையில் புதுச்சேரியில் தற்போதைக்கு பள்ளி மற்றும் கல்லூரிகள் திறப்பு இல்லை என அம்மாநில கல்வி துறை அமைச்சர் நமச்சிவாயம் அறிவித்துள்ளார். கொரோனா மூன்றாவது அலை எப்போது உறுதி ஆகும் என தெரியவில்லை. மூன்றாவது அலை எச்சரிக்கையைக் கருத்தில் கொண்டு ஆகஸ்ட் 15ஆம் தேதிக்கு பின்னர் ஆலோசித்து முடிவு செய்யப்படும். மேலும் மாணவர்களுக்கு முழுமையாக தடுப்பூசி போட்ட பிறகு கல்லூரிகளை திறப்பது குறித்து முடிவு செய்யப்படும் என்று அவர் கூறியுள்ளார்.