பூட்டிய வீட்டுக்குள் முதியவர் அழுகிய பிணமாக கிடந்த சம்பவம் பரபரப்பை ஏற்படுத்தியுள்ளது.
திருநெல்வேலி மாவட்டத்திலுள்ள பாளையங்கோட்டை பகுதியில் மகாதேவன் என்பவர் வசித்து வந்துள்ளார். இவருக்கு திருமணம் ஆகவில்லை. இந்நிலையில் அவரது வீட்டில் இருந்து திடீரென துர்நாற்றம் வீசியது. இதுகுறித்து அப்பகுதி மக்கள் பெருமாள்புரம் காவல்துறையினருக்கு தகவல் தெரிவித்துள்ளனர். அந்த தகவல்களின்படி காவல்துறையினர் சம்பவ இடத்திற்கு விரைந்து சென்றனர். இதனையடுத்து காவல்துறையினர் வீடு உள்புறம் பூட்டப்பட்டிருந்ததால் கதவை உடைத்து உள்ளே சென்று பார்த்தனர்.
அப்போது மகாதேவன் தலைகுப்புற அழுகிய நிலையில் பிணமாக கிடந்துள்ளார். அதன் பின் காவல்துறையினர் மகாதேவனின் சடலத்தை கைப்பற்றி பாளையங்கோட்டை ஐகிரவுண்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து குலவணிகர்புரம் கிராம நிர்வாக அலுவலர் ஆனந்தி ராமகிருஷ்ணன் அளித்த புகாரின் பேரில் வழக்கு பதிவு செய்த காவல்துறையினர் விசாரணை மேற்கொண்டு வருகின்றனர்.