நடுக்கடலில் படகில் தத்தளித்த அகதிகளை தொண்டு நிறுவனம் ஒன்று மீட்டுள்ளது.
ஆப்பிரிக்கா மற்றும் மத்திய கிழக்கு நாடுகளிலிருந்து அரசியல், பொருளாதார நெருக்கடி, வறுமை, போன்ற காரணங்களால் மக்கள் ஐரோப்பிய நாடுகளை நோக்கி படையெடுத்து வருகின்றனர். இதனால் ஐரோப்பியாவிற்கு வரும் அகதிகளின் எண்ணிக்கை அதிகரித்து வருகிறது. இதனை அடுத்து கடந்த வாரம் மொராக்கோ, வங்கதேசம், எகிப்து, சிரியா போன்ற நாடுகளை சேர்ந்த அகதிகள் நடுக்கடலில் படகில் தத்தளித்துக் கொண்டிருந்த பொழுது SOS Mediterranee என்னும் தொண்டு நிறுவனத்தின் கப்பல் மூலம் மீட்கப்பட்டு இத்தாலியிலுள்ள டிரப்பானி துறைமுகத்திற்கு அழைத்து வரப்பட்டனர்.
இந்த நிலையில் நேற்று துனிசியா நாட்டின் அருகே உள்ள சர்வதேச கடல் பகுதியில் 257 அகதிகள் படகில் தத்தளித்துள்ளனர். இவர்களை அதே தொண்டு நிறுவனம் மீட்டு இத்தாலியில் இருக்கும் சிசிலி தீவிலுள்ள டிரப்பானி துறைமுகத்திற்கு அழைத்து சென்றுள்ளனர். இதுவரை இந்த ஆண்டில் மட்டும் படகில் புறப்பட்ட 1100க்கும் மேலான அகதிகள் மத்திய கடல் பகுதியில் உயிரிழந்துள்ளதாக ஐ.நா.வின் சர்வதேச இடம்பெயர்வு அமைப்பு தெரிவித்துள்ளது.