2 கார்களை திருடிச் சென்று அதன்மூலம் கஞ்சா விற்பனை செய்த ஒருவரை காவல்துறையினர் கைது செய்துள்ளனர்.
திருப்பத்தூர் மாவட்டத்தில் உள்ள ஜோலார்பேட்டை அருகில் தனிப்படை காவல்துறையினர் தீவிர ரோந்து பணியில் ஈடுபட்டுள்ளனர். அப்போது அவ்வழியாக வந்த காரை நிறுத்தி சோதனை செய்த போது அதில் கஞ்சா இருந்தது தெரியவந்துள்ளது. இதனையடுத்து காரை ஓட்டி வந்த நபரை பிடித்து காவல் நிலையத்தில் தனிப்படை காவல்துறையினர் ஒப்படைத்துள்ளனர்.
பின்னர் காவல்துறையினர் அவரிடம் விசாரணை செய்த போது அவர் ஜகன் குமார் என்பது தெரியவந்துள்ளது. இதனைத் தொடர்ந்து இவர் 3 மாதங்களுக்கு முன்பாக ஆம்பூர் பைபாஸ் சாலையில் ரவிக்குமார் என்பவருக்கு சொந்தமான 2 கார்களுக்கு ஓட்டுநராக பணிபுரிந்து வந்த நிலையில் அதை திருடியதும் தெரியவந்துள்ளது. இது குறித்து வழக்குப்பதிவு செய்த காவல்துறையினர் அவரை கைது செய்துயுள்ளனர். மேலும் அவரிடம் இருந்த 2 கார்கள் மற்றும் 40 கிலோ கஞ்சாவை பறிமுதல் செய்துள்ளனர்.