ஆட்டோ நிலைதடுமாறி கவிழ்ந்த விபத்தில் வாலிபர் உயிரிழந்த சம்பவம் சோகத்தை ஏற்படுத்தியுள்ளது.
திருநெல்வேலி மாவட்டத்திலுள்ள பாளையங்கோட்டை பகுதியில் இசக்கிமுத்து என்பவர் வசித்து வருகிறார். இவருக்கு இசக்கிராஜா என்ற மகன் உள்ளார். இவர் தனது தந்தைக்கு உதவியாக பூ வியாபாரம் செய்து வந்தார். இந்நிலையில் இசக்கிராஜா தனது நண்பர்களான முத்துக்குமார், முத்து சரவணன், நம்பிராஜன் ஆகியோருடன் ஆட்டோவில் சென்று கொண்டிருந்தார். அப்போது குலவணிகர்புரம் அருகே உள்ள வேகத்தடையில் வந்தபோது ஆட்டோ நிலைதடுமாறி கீழே தலைகுப்புற கவிழ்ந்தது.
இந்த விபத்தில் ஆட்டோவின் உள்ளே இருந்த 4 பேரும் பலத்த காயமடைந்தனர். இதனைப் பார்த்த அருகிலுள்ளவர்கள் நான்கு பேரையும் உடனடியாக மீட்டு பாளையங்கோட்டை ஐகிரவுண்டு அரசு மருத்துவமனைக்கு சிகிச்சைக்காக அனுப்பி வைத்தனர். ஆனால் செல்லும் வழியிலேயே இசக்கி ராஜா பரிதாபமாக உயிரிழந்தார். இதனைத்தொடர்ந்து மற்ற 3 பேருக்கும் மருத்துவமனையில் தீவிர சிகிச்சை அளிக்கப்பட்டு வருகிறது. மேலும் இதுகுறித்து வழக்கு பதிவு செய்த நெல்லை மாநகர போக்குவரத்து புலனாய்வு பிரிவு காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.