ஆப்கானிஸ்தானிலிருந்து தப்பிச்சென்ற அதிபர் அஷ்ரப் கனி அபுதாபியில் குடிபெயர்ந்துள்ளதாக தகவல் வெளியாகியுள்ளது.
கடந்த 15-ஆம் தேதி தலிபான் பயங்கரவாதிகள் ஆப்கானிஸ்தான் தலைநகரான காபூலை கைப்பற்றினர். அதன் பிறகு அதிபர் அஷ்ரப் கனி நாட்டை விட்டு வெளியேறி அரசு அதிகாரிகளுடன் தஜிகிஸ்தானுக்கு தப்பி சென்றுவிட்டார் எனவும், ஹெலிகாப்டர் மற்றும் கார்கள் முழுவதும் பணத்தை அள்ளிச் சென்றார் எனவும் பரபரப்பு தகவல் வெளியானது.
அதோடு மட்டுமில்லாமல் கார்கள் மற்றும் ஹெலிகாப்டர் முழுவதும் பணங்கள் நிரம்பியதால் அவற்றை செல்லும் வழியிலேயே விட்டு சென்றார் என்றும் கூறப்பட்டது. இதையடுத்து தஜிகிஸ்தானில் அஷ்ரப் கனி சென்ற விமானம் தரையிறங்குவதற்கு அனுமதி வழங்கப்படவில்லை எனவும், இதன் காரணமாகவே அதிபர் அஷ்ரப் கனி ஓமன் நாட்டிற்கு சென்று விட்டார் எனவும் தகவல் வெளியானது.
இதற்கிடையே ஐக்கிய அரபு அமீரகத்தின் தலைநகரான அபுதாபியில் நாட்டை விட்டு தப்பியோடிய அஷ்ரப் கனி குடிபெயர்ந்துள்ளார் என்று செய்தி வெளியாகியுள்ளது. மேலும் சுமார் 169 மில்லியன் அமெரிக்க டாலர்களை அஷ்ரப் கனி ஆப்கானிஸ்தானிலிருந்து எடுத்துச் செல்ல முயற்சித்ததாகவும், ஆனால் சில பணத்தை மட்டும் அவர் அவசரம் காரணமாக விமான நிலையத்தில் விட்டு சென்றதாக கூறப்படுகிறது.