நெல்லை எக்ஸ்பிரஸ் ரயிலுக்குள் பாம்பு இருந்ததை பார்த்த பயணிகள் அலறியடித்து ஓடினர்.
சென்னை மாவட்டத்திலுள்ள எழும்பூரில் இருந்து திருநெல்வேலி நெல்லை எக்ஸ்பிரஸ் ரயில் இயக்கப்படுகிறது. இந்த ரயிலை சேத்துப்பட்டு பணிமனையில் சுத்தம் செய்வர். இந்நிலையில் எழும்பூர் ரயில் நிலைய நடைமேடை எண் 7-க்கு நெல்லை எக்ஸ்பிரஸ் ரயில் வந்தவுடன் முன்பதிவு செய்த பயணிகள் அதில் ஏற தொடங்கியுள்ளனர். இதனையடுத்து எஸ்-1 பெட்டியிலிருக்கும் 44-வது இருக்கையில் பாம்பு ஒன்று இருந்ததை பார்த்து அதிர்ச்சி அடைந்த பயணிகள் உடனடியாக வெளியே வந்துள்ளனர்.
இதுகுறித்து தகவல் அறிந்த தீயணைப்பு படை வீரர்கள் சம்பவ இடத்திற்கு விரைந்து சென்று இருக்கையில் இருந்த பாம்பை பத்திரமாக பிடித்துவிட்டனர். இது குறித்து தீயணைப்பு துறையினர் கூறும் போது, இது கொம்பேறி மூக்கன் வகையைச் சேர்ந்த பாம்பு என தெரிவித்துள்ளனர். இதனையடுத்து தீயணைப்பு வீரர்கள் அந்த பாம்பை வனத்துறையினரிடம் ஒப்படைத்தனர்.