கடை உரிமையாளரை மர்ம கும்பலை சேர்ந்தவர்கள் பீர் பாட்டிலால் தாக்கிய சம்பவம் அதிர்ச்சியை ஏற்படுத்தியுள்ளது.
சிவகங்கை மாவட்டத்தில் உள்ள காளையார் கோவில் பகுதியில் சரவணன் என்பவர் வசித்து வருகிறார். இவர் ஆடியோ பதிவு செய்யும் கடை வைத்து நடத்தி வந்துள்ளார். மேலும் சரவணன் மக்கள் அதிகாரம் அமைப்பின் பகுதி ஒருங்கிணைப்பாளராக இருக்கின்றார். இந்நிலையில் நண்பரான மணிகண்டன் என்பவரை பார்த்துவிட்டு சரவணன் மோட்டார் சைக்கிளில் வீட்டிற்கு புறப்பட்டுள்ளார்.
இதனை அடுத்து திடீரென சரவணனை சுற்றி வளைத்த 5 பேர் கொண்ட கும்பல் பீர் பாட்டிலால் அவரை சரமாரியாக தாக்கி விட்டு அங்கிருந்து தப்பி ஓடினர். அதன் பின் படுகாயமடைந்த சரவணனை அருகில் உள்ளவர்கள் மீட்டு அரசு மருத்துவமனையில் சிகிச்சைக்காக அனுமதித்துள்ளனர். இதுகுறித்த புகாரின் பேரில் வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.