சூர்யா நடிப்பில் உருவாகி வரும் எதற்கும் துணிந்தவன் படத்தில் குக் வித் கோமாளி பிரபலம் புகழ் இணைந்துள்ளார்.
தமிழ் திரையுலகில் முன்னணி கதாநாயகனாக வலம் வரும் சூர்யா தற்போது பாண்டிராஜ் இயக்கத்தில் எதற்கும் துணிந்தவன் படத்தில் நடித்து வருகிறார். இந்த படத்தில் பிரியங்கா மோகன் கதாநாயகியாக நடிக்கிறார். மேலும் சத்யராஜ், சரண்யா பொன்வண்ணன், சூரி, திவ்யா துரைசாமி, இளவரசு உள்ளிட்ட பலர் முக்கிய கதாபாத்திரங்களில் நடிக்கின்றனர். சன் பிக்சர்ஸ் நிறுவனம் தயாரிக்கும் இந்த படத்திற்கு டி.இமான் இசையமைக்கிறார்.
நேற்று எதற்கும் துணிந்தவன் படத்தின் படப்பிடிப்பு தளத்தில் நடிகர் சூரி தனது பிறந்தநாளை படக்குழுவினருடன் கேக் வெட்டி கொண்டாடியுள்ளார். இந்நிலையில் சூரியின் பிறந்தநாள் கொண்டாட்ட புகைப்படத்தில் குக் வித் கோமாளி பிரபலம் புகழ் இருக்கிறார். இதிலிருந்து புகழ் இந்த படத்தில் நடிப்பது உறுதி செய்யப்பட்டுள்ளது. இதனால் ரசிகர்கள் மிகுந்த உற்சாகத்தில் உள்ளனர். இதுதவிர அஜித், அருண் விஜய், சந்தானம், விஜய் சேதுபதி போன்ற ஹீரோக்களின் படங்களிலும் புகழ் நடித்து வருகிறார் என்பது குறிப்பிடத்தக்கது.