அண்ணனை கத்தியால் குத்திய தம்பியை காவல்துறையினர் வலைவீசி தேடி வருகின்றனர்.
ராணிப்பேட்டை மாவட்டத்தில் உள்ள காவனூர் பகுதியில் தேவநாராயணன் என்பவர் வசித்து வந்துள்ளார். இவர் கட்டிட மேஸ்திரியாக வேலை பார்த்து வந்துள்ளார். இவருக்கு குடிப்பழக்கம் இருந்து வந்துள்ளது. இந்நிலையில் தேவநாராயணன் மதுபோதையில் தனது தாயை தகாத வார்த்தைகளால் திட்டியுள்ளார். இதனைப் பார்த்த தேவநாராயணனின் தம்பியான கணபதி என்பவர் அவரை தட்டி கேட்டுள்ளார். இதனால் அவர்கள் இருவருக்கும் இடையே வாக்குவாதம் ஏற்பட்டுள்ளது.
இதனையடுத்து வாக்குவாதம் முற்றிய நிலையில் ஆத்திரமடைந்த கணபதி தனது அண்ணனான தேவநாராயணனை கத்தியால் சரமாரியாக குத்தியுள்ளார். இதனால் பலத்த காயமடைந்த தேவநாராயணன் சம்பவ இடத்திலேயே துடித்துடித்து பரிதாபமாக உயிரிழந்தார். இது குறித்து தகவல் அறிந்த திமிரி காவல்துறையினர் சம்பவ இடத்திற்கு விரைந்து சென்று தேவநாராயணனின் உடலை கைப்பற்றி ஆற்காடு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்கு பதிவு செய்த காவல்துறையினர் தலைமறைவான கணபதியை வலைவீசி தேடி வருகின்றனர்.