லாரி மூலமாக கேரளாவுக்கு அரிசி கடத்திய 5 பேரை காவல்துறையினர் கைது செய்துள்ளனர்.
கள்ளக்குறிச்சி மாவட்டத்தில் உள்ள ஏதலவாடி கிராம வயலில் இருக்கும் குடோனில் சட்ட விரோதமாக ரேஷன் அரிசி மூட்டைகளை பதுக்கி வைத்து லாரியில் கடத்தி செல்வதாக காவல்துறையினருக்கு தகவல் கிடைத்துள்ளது. அந்த தகவலின் பேரில் காவல்துறையினர் அப்பகுதியில் தீவிர சோதனையில் ஈடுபட்டுள்ளனர். அப்போது இரண்டு லாரிகளில் அரிசி மூட்டைகளை ஏற்றிக்கொண்டு 1௦-க்கும் அதிகமானோர் வந்து கொண்டிருந்த நிலையில் காவல்துறையினரை பார்த்ததும் அவர்கள் இறங்கி தப்பி ஓடியுள்ளனர்.
இதனைப் பார்த்த காவல்துறையினர் அவர்களை துரத்தி சென்று மடக்கி பிடித்துள்ளனர். பின்னர் அவர்களை விசாரணை செய்த போது சக்தி, முத்துக்குமார், சிவப்பிரகாஷ், மாசிலாமணி, ராமமூர்த்தி என்பது தெரியவந்துள்ளது. பிறகு இவர்கள் பொதுமக்களிடமிருந்து குறைவான விலைக்கு ரேஷன் அரிசிகளை வாங்கியுள்ளனர். அதனை பதுக்கி வைத்து லாரியின் மூலமாக வெளிமாநிலத்திற்கு கடத்தி செல்ல முயற்சி செய்தது தெரியவந்துள்ளது.
பிறகு ஐந்து பேரையும் காவல்துறையினர் கைது செய்துள்ளனர். இதனைத் தொடர்ந்து லாரி மற்றும் குடோனில் வைத்திருந்த 25 டன் அரிசி மூட்டைகளை காவல்துறையினர் பறிமுதல் செய்து குடிமை பொருள் கடத்தல் தடுப்பு பிரிவு காவல்துறையினரிடம் ஒப்படைத்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் அரிசி கடத்தல் கும்பல் தலைவரான சுகர்ணா என்பவரை வலைவீசி தேடி வருகின்றனர்.