அரசு உயர்நிலைபள்ளியில் மரக்கன்றுகள் நடுவதற்கு குழி தோண்டியபோது முதுமக்கள் தாழி கண்டெடுக்கப்பட்டுள்ளது.
நாமக்கல் மாவட்டம் பரமத்திவேலூரை அடுத்துள்ள கொந்தளம் ஊராட்சியில் அரசு உயர்நிலைப்பள்ளி செயல்பட்டு வருகின்றது. இந்நிலையில் 100 நாள் வேலைவாய்ப்பு திட்டத்தின் கீழ் பணிபுரியும் தொழிலாளர்கள் பள்ளி வளாகத்தில் மரகன்றுகளை நடுவதற்காக குழிகள் தோண்டியுள்ளனர். அப்போது பெரிய அளவிலான பானைகள் இருந்துள்ளது. இதனை பார்த்த தொழிலாளர்கள் அதனை எடுத்து பார்த்தபோது அதில் எலும்புக்கூடுகள் இருந்துள்ளது. இதனையடுத்து அங்கிருந்தவர்கள் பரமத்திவேலூர் தாசில்தாருக்கு தகவல் தெரிவித்துள்ளனர்.
தகவலறிந்து சென்ற தாசில்தார் அப்பன்ராஜ், கபிலர்மலை வட்டார கல்வி அலுவலர் குணசேகரன், கொந்தளம் ஊராட்சி மன்ற தலைவர் மணிமேகலை பழனிச்சாமி ஆகியோர் சம்பவ இடத்திற்கு சென்று சோதனை செய்ததில் அது முதுமக்கள் தாழி என உறுதி செய்யப்பட்டுள்ளது. இதனைதொடர்ந்து அதனை மீட்டு கொந்தளம் கிராம நிர்வாக அலுவலகத்திற்கு எடுத்து சென்றுள்ளனர். மேலும் தொல்பொருள் துறையினர் ஆய்வு செய்த பின்னரே எத்தனை ஆண்டுகளுக்கு முன்பு வைக்கப்பட்ட தாழி என்பது தெரியவரும் என அதிகாரிகள் தெரிவித்துள்ளனர். இதனை அப்பகுதி பொதுமக்கள் மிகுந்த ஆர்வத்துடன் பார்த்து சென்றுள்ளனர்.