சிறை கைதி உடல்நலக்குறைவால் உயிரிழந்த சம்பவம் சோகத்தை ஏற்படுத்தியுள்ளது.
திருநெல்வேலி மாவட்டத்திலுள்ள பணகுடி பகுதியில் சுப்பையா என்பவர் வசித்து வந்துள்ளார். இவர் தனது முதல் மனைவியின் மகன் இசக்கி முத்து மற்றும் அவரது நண்பரான தண்டையார்குளம் பகுதியில் வசிக்கும் இசக்கி பாண்டியன் ஆகியோருடன் சேர்ந்து 2-வது மனைவியின் மகனான அஜித் குமார் என்பவரை கொலை செய்துள்ளார். இது குறித்து வழக்கு பதிவு செய்த கூடங்குளம் காவல்துறையினர் சுப்பையாவை கைது செய்து பாளையங்கோட்டை சிறையில் அடைத்தனர்.
கடந்த 4-ஆம் தேதி அன்று சுப்பையாவிற்கு திடீரென உடல் நலக்குறைவு ஏற்பட்டுள்ளது. இதனால் அவரை சிறை காவலர்கள் பாளையங்கோட்டை அரசு மருத்துவமனைக்கு சிகிச்சைக்காக அனுமதித்தனர். ஆனால் அங்கு அளிக்கப்பட்ட சிகிச்சை பலனின்றி சுப்பையா பரிதாபமாக உயிரிழந்தார். மேலும் இது குறித்து வழக்கு பதிவு செய்த பெருமாள்புரம் காவல்துறையினர் விசாரணை நடத்தி வருகின்றனர்.