கத்தார் ஏர்வேஸ் விமானத்தின் மூலம் 28 அமெரிக்கர்கள் உட்பட 35 பேர் ஆப்கானிஸ்தான் தலைநகர் காபூலில் இருந்து வெளியேற்றப்பட்டுள்ளனர்.
ஆப்கானிஸ்தானை கடந்த ஆகஸ்டு 15 ஆம் தேதி முழுமையாக கைப்பற்றியதை தொடர்ந்து அதிகாரம் முழுவதும் தலீபான் அமைப்பினரிடம் சென்றது. மேலும் தலீபான்கள் எப்பொழுதும் துப்பாக்கியும் கையுமாக நகரில் வலம் வந்து கொண்டிருக்கின்றனர். இதனால் அந்நாட்டு மக்கள் அனைவரும் தலீபான்களுக்கு பயந்து ஆப்கானை விட்டு வெளியேறி வருகின்றனர். குறிப்பாக, அமெரிக்க படைகள் முழுவதும் அந்நாட்டில் இருந்து வெளியேறுவதற்கு முன்பாக மக்கள் வெளியேறியது குறிப்பிடத்தக்கதாகும். தற்போது காபூலை விட்டு மேலும் சிலர் கத்தார் ஏர்வேஸின் விமானம் மூலம் கடந்த வெள்ளிகிழமை அன்று வெளியேறி உள்ளதாக தகவல்கள் வெளியாகியுள்ளது.
இவர்களில் அமெரிக்க நாட்டினர் 28 பேரும் காபூலின் நிரந்தர குடியிருப்புவாசிகளான 7 பேரும் அடங்குவர் என தெரியவந்துள்ளது. இதுகுறித்து அமெரிக்க நாட்டின் வெளியுறவுத்துறை சேர்ந்த செய்தித்தொடர்பாளர் நெட் பிரைஸ் கடந்த செப்டம்பர் 18 ஆம் தேதி அன்று அறிக்கை ஒன்றை வெளியிட்டுள்ளார். இதில் அவர் கூறியதாவது “அமெரிக்கர்கள் காபூலை விட்டு வெளியேற உதவியாக இருந்த கத்தார் ஏர்வேஸ் நிறுவனத்திற்கு நாங்கள் மிகவும் கடமைப்பட்டு உள்ளோம். மேலும் ஆப்கானை விட்டு வெளியேற விரும்பும் அமெரிக்கர்களும் அமெரிக்க நாட்டுடன் ஒன்றிணைந்து செயல்படுகின்ற ஆப்கான் மக்களுக்கும் அமெரிக்க நாடு எப்பொழுதும் உறுதுணையாக இருக்கும்” என்று கூறியுள்ளார்.