மாணவர்களுக்கிடையே ஏற்பட்ட மோதலால் நிகழ்ந்த துப்பாக்கிச்சூட்டில் 4 பேர் படுகாயம் அடைந்த சம்பவம் பெரும் பரபரப்பை ஏற்படுத்தியுள்ளது.
அமெரிக்கா நாட்டில் வர்ஜீனியா பகுதியில் ஹெரிட்டேஜ் என்னும் உயர்நிலைப்பள்ளி வளாகத்தில் கடந்த திங்கட்கிழமை அன்று மதிய வேளையில் துப்பாக்கிச்சூடு நடத்தப்பட்டுள்ளது. இது குறித்து தகவலறிந்ததும் காவல்துறையினர் சம்பவ இடத்திற்கு விரைந்து வந்து துப்பாக்கிச் சூட்டிற்கு காரணமான 19 வயது இளம் பெண்ணை கைது செய்துள்ளனர். இந்த துப்பாக்கி சூட்டில் 17 வயதுடைய மாணவனுக்கு முகத்திலும் 17 வயதுடைய மாணவிக்கு காலின் கீழ் பகுதியிலும் குண்டுகள் பாய்ந்துள்ளது.
உடனடியாக அவர்கள் அருகிலுள்ள மருத்துவமனையில் சிகிச்சைக்காக அனுமதிக்கப்பட்டுள்ளனர். இவர்களை தொடர்ந்து மேலும் 2 மாணவர்கள் மருத்துவமனையில் சிகிச்சைக்காக அனுமதிக்கப்பட்டுள்ளனர். அதில் ஒரு மாணவர் ஆஸ்துமா பிரச்சனைகாகவும் மற்றொரு மாணவி கையில் சிறு காயங்களுடனும் மருத்துவமனையில் சிகிச்சை பெற்று வருகின்றனர்.
இதனையடுத்து பள்ளியில் உள்ள மாணவர்கள் அனைவரும் அங்குள்ள டென்னிஸ் கோர்ட்டுக்கு பத்திரமாக அனுப்பி வைக்கபட்டுள்ளனர். பின்னர் மாணவர்களுடைய பெற்றோருக்கு தகவல் கொடுக்கப்பட்டது. இதனைத்தொடர்ந்து பெற்றோர்கள் பள்ளிக்கு வந்தவுடன் அவர்களுடன் மாணவர்கள் பத்திரமாக அனுப்பி வைக்கப்பட்டுள்ளதாக காவல்துறை அதிகாரிகள் கூறியுள்ளனர்.
மேலும் காவல்துறையினர் துப்பாக்கி சூட்டிற்கு காரணமான இளம்பெண்ணிடம் விசாரணை நடத்தியுள்ளனர். இந்த விசாரணையில் துப்பாக்கிசூட்டில் காயமடைந்த மாணவர்ளுடனான வாக்குவாதமே காரணம் என இளம்பெண் கூறியுள்ளதாக காவல்துறை அதிகாரிகள் தெரிவித்துள்ளனர்.