விதிமுறையை மீறியதற்காக மாஞ்சோலைக்கு சென்ற சுற்றுலா பயணிகளுக்கு அபராதம் விதிக்கப்பட்டுள்ளது.
தென்தமிழகத்தில் பிரசித்தி பெற்ற சுற்றுலாத் தலமான ஒன்று திருநெல்வேலி மாவட்டத்தில் உள்ள மேற்கு தொடர்ச்சி மலைப்பகுதியில் அமைந்துள்ள மாஞ்சோலை தேயிலை தோட்ட பகுதி. இந்நிலையில் வனத்துறையினர் கொரோனா ஊரடங்கு தளர்வுகளை தொடர்ந்து விதிமுறைக்கு உட்பட்டு தினமும் 5 வாகனங்கள் மட்டும் மாஞ்சோலை பகுதிக்கு செல்ல அனுமதித்து வருகின்றனர்.
இதனையடுத்து மாஞ்சோலை பகுதிக்கு சுற்றுலா செல்லும் பயணிகள் காலை 6 மணிக்கு சென்று அதன் பின்னர் மாலை 6 மணிக்குள் மணிமுத்தாறு வன சோதனை சாவடிக்கு வர வேண்டியது கட்டாயமாகும். இந்நிலையில் குமரி மாவட்டத்தில் வசிக்கும் 6 பேர் மாஞ்சோலை சுற்றுலா சென்று விட்டு 6 மணிக்கு மேல் தாமதமாக சோதனை சாவடிக்கு வந்துள்ளனர். இதனால் புலிகள் காப்பக துணை இயக்குனர் செண்பகப்பிரியா அறிவுறுத்தலின்படி அம்பை வனச்சரகர் கார்த்திகேயன் தாமதமாக வந்த ஒவ்வொருவருக்கும் ரூ.1000 வீதம் ரூ.6 ஆயிரம் அபராதம் வசூலித்தனர்.