14 -வது சீசன் ஐபிஎல் தொடரில் இன்று நடைபெறும் 41-வது லீக் ஆட்டத்தில் டெல்லி கேப்பிடல்ஸ் -கொல்கத்தா நைட் ரைடர்ஸ் அணிகள் மோதுகின்றன.
14 -வது சீசன் ஐபிஎல் தொடர் விறுவிறுப்பாக நடைபெற்று வருகிறது .இதில் இன்று நடைபெறும் 41 -வது லீக் ஆட்டத்தில் டெல்லி கேப்பிடல்ஸ் -கொல்கத்தா நைட் ரைடர்ஸ் அணிகள் பலப்பரீட்சை நடத்துகின்றன. இதுவரை 10 போட்டிகளில் விளையாடியுள்ள டெல்லி அணி 2-ல் தோல்வி, 8 வெற்றியுடன் புள்ளி பட்டியலில் 2-வது இடத்தில் உள்ளது .அதேபோல் 10 போட்டிகளில் விளையாடியுள்ள கொல்கத்தா அணி 4 வெற்றி , 6 தோல்வியுடன் புள்ளி பட்டியலில் 4-வது இடத்தில் உள்ளது. ஐக்கிய அரபு அமீரகத்தில் தொடங்கிய இரண்டாவது பாதி ஆட்டத்தில் கொல்கத்தா அணி தனது மிரட்டலான ஆட்டத்தை தொடங்கியது.
குறிப்பாக பெங்களூர் மற்றும் மும்பை அணிகளுக்கு எதிரான ஆட்டத்தில் கொல்கத்தா அணி அபார வெற்றி பெற்றது .ஆனால் சென்னை அணிக்கு எதிரான ஆட்டத்தில் 2 விக்கெட் வித்தியாசத்தில் தோல்வியை சந்தித்தது .இதையடுத்து டெல்லி அணியும் பலம் வாய்ந்த அணியாக காணப்படுகிறது.இதற்கு முன்னதாக கொல்கத்தா- டெல்லி அணிகளுக்கு இடையே நடந்த போட்டியில் கொல்கத்தா அணி 7 விக்கெட் வித்தியாசத்தில் தோல்வி அடைந்தது. இதனால் இன்றைய போட்டியில் இதற்கு பதிலடி கொடுக்கும் முனைப்புடன் களமிறங்கும் என எதிர்பார்க்கப்படுகிறது .அதேசமயம் டெல்லி அணி தனது ஆதிக்கத்தை நிலைநாட்டும் முனைப்புடன் களமிறங்கும் என்பதால் இன்றைய போட்டியில் விறுவிறுப்புக்கு பஞ்சம் இருக்காது. இந்திய நேரப்படி இன்று மாலை 3.30 மணிக்கு சர்ஜா மைதானத்தில் நடைபெறுகிறது.