செல்போனில் பேசியதை கண்டித்த கணவரை மனைவி கத்தியால் சரமாரியாக குத்திய சம்பவம் பரபரப்பை ஏற்படுத்தியுள்ளது.
சேலம் மாவட்டம் எடப்பா டியை அடுத்த மசையன் தெரு காட்டூர் பகுதியில் பாலமுருகன் என்பவர் வசித்து வருகிறார். கிருஷ்ணகிரியில் இலக்கியா என்பவர் வசித்து வருகிறார். இவர் கோவில் திருவிழாக்களில் நடனமாடும் பெண்களுக்கு அலங்காரம் செய்யும் வேலையில் ஈடுபட்டு வந்துள்ளார். இந்த பணிக்காக இலக்கியா எடப்பாடி பகுதிக்கு வந்தபோது பாலமுருகனுடன் பழக்கம் ஏற்பட்டு இருவருக்கும் இடையில் காதல் மலர்ந்தது. ஆனால் காதலர்கள் வேறு சமூகத்தை சேர்ந்தவர்கள் என்பதால் இலக்கியாவின் பெற்றோர் இதற்கு எதிர்ப்பு தெரிவித்தனர். இதனையடுத்து இலக்கியா மற்றும் பாலமுருகன் வீட்டை விட்டு வெளியேறி கடந்த 2 ஆண்டுகளுக்கு முன்பு திருமணம் செய்து கொண்டனர். இவர்களுக்கு தற்போது 7 மாதத்தில் ஒரு குழந்தை இருக்கின்றது. இந்நிலையில் கணவன்-மனைவி இருவருக்கும் இடையே அடிக்கடி குடும்ப தகராறு ஏற்பட்டு இலக்கியா கோபித்துக்கொண்டு கிருஷ்ணகிரியில் உள்ள தனது பெற்றோர் வீட்டிற்கு சென்று விட்டார்.
அதன்பின் இலக்கியா கடந்த சில மாதங்களுக்கு முன்பு கிருஷ்ணகிரி அனைத்து மகளிர் காவல் நிலையத்தில் பாலமுருகன் மீது புகார் கொடுத்துள்ளார். அந்தப் புகார் எடப்பாடி காவல் நிலையத்திற்கு மாற்றப்பட்டு காவல்துறையினர் விசாரணை மேற்கொண்டு பாலமுருகனை கைது செய்து சிறையில் அடைத்தனர். ஆனால் கடந்த சில நாட்களுக்கு பிறகு பாலமுருகன் ஜாமினில் வெளியே வந்தார். இந்நிலையில் இலக்கியா மீண்டும் பாலமுருகனுடன் வாழ்வதற்காக அவருடைய வீட்டிற்கு வந்துள்ளார். அப்போது பாலமுருகனிடம் இலக்கியா காவல் நிலையத்தில் கொடுத்த புகாரை வாபஸ் பெறுவதாகவும், நாம் ஒன்றாக வாழலாம் என்றும் தெரிவித்துள்ளார். அதன்பின் பாலமுருகன் தனது மனைவியுடன் சமாதானம் அடைந்து குடும்பம் நடத்தி வந்துள்ளார்.
இதனைதொடர்ந்து இலக்கியா இரவில் செல்போனில் நீண்ட நேரமாக சிறிது பேசியதால் பாலமுருகன் அவரை கண்டித்துள்ளார். இதன் காரணமாக அவர்களுக்கு இடையில் மீண்டும் தகராறு ஏற்பட்டு ஆத்திரமடைந்த இலக்கியா பாலமுருகனை கத்தியால் சரமாரியாக குத்தினார். இதனால் அதிர்ச்சியடைந்த பாலமுருகனின் தாய் ஜோதி இலக்கியாவை தடுக்க முயன்றபோது அவரை கீழே தள்ளி விட்டார். அதன்பின் அக்கம்பக்கத்தினர் விரைந்து வந்து 2 பேரையும் மீட்டு சிகிச்சைக்காக எடப்பாடி அரசு மருத்துவமனையில் அனுமதித்தனர். அங்கு இருந்து பாலமுருகன் மேல் சிகிச்சைக்காக சேலம் அரசு மருத்துவமனையில் அனுமதிக்கப்பட்டார். இது தொடர்பாக காவல்துறையினர் வழக்குப்பதிவு செய்து இலக்கியாவை கைது செய்து கோர்ட்டில் ஆஜர்படுத்தி பெண்கள் சிறையில் அடைத்தனர்.