முன் விரோதத்தில் வாலிபரை கத்தியால் குத்திய நபரை காவல்துறையினர் கைது செய்துள்ளனர்.
அரியலூர் மாவட்டத்தில் உள்ள அங்கராயநல்லூர் பகுதியில் விஜயகுமார் என்பவர் வசித்து வருகிறார். இவருக்கும் பக்கத்து வீட்டில் வசிக்கும் சண்முகம் என்பவருக்கும் இடையே இடப் பிரச்சினை காரணமாக முன்விரோதம் இருந்துள்ளது. இந்நிலையில் இருவருக்கும் இடையே மீண்டும் தகராறு ஏற்பட்ட போது விஜயகுமாரை சண்முகம் தகாத வார்த்தைகளால் திட்டியதோடு கத்தியால் சரமாரியாக குத்தியுள்ளார்.
இதனால் படுகாயமடைந்த விஜயகுமாரை அருகில் உள்ளவர்கள் மீட்டு சிகிச்சைக்காக மருத்துவமனையில் அனுமதித்துள்ளனர். இதுகுறித்த புகாரின் பேரில் வழக்குப்பதிவு செய்த காவல்துறையினர் சண்முகத்தை கைது செய்து விசாரணை மேற்கொண்டு வருகின்றனர்.