கிணற்றில் தொழிலாளி பிணமாக மீட்கப்பட்ட சம்பவம் பரபரப்பை ஏற்படுத்தியுள்ளது.
திருநெல்வேலி மாவட்டத்திலுள்ள அலங்காரப்பேரி பகுதியில் முத்துராமலிங்கம் என்பவர் வசித்து வந்துள்ளார். இவர் கூலி வேலை செய்து வந்துள்ளார். கடந்த 2-ஆம் தேதி வீட்டை விட்டு வெளியே சென்ற முத்துராமலிங்கம் இன்று வரை வீடு திரும்பாததால் அவரது மனைவி பதற்றம் அடைந்துள்ளார். இதுகுறித்து அவருடைய மனைவி சீவலப்பேரி காவல் நிலையத்தில் புகார் அளித்துள்ளார். அந்த புகாரின் பேரில் காவல்துறையினர் முத்து ராமலிங்கத்தை தேடி வந்தனர்.
இந்நிலையில் அந்த பகுதியில் உள்ள ஒரு கிணற்றில் முத்துராமலிங்கத்தின் சடலம் மிதப்பதாக அப்பகுதியில் உள்ள பொதுமக்கள் காவல்துறையினருக்கு தகவல் தெரிவித்துள்ளனர். அந்த தகவலின் படி சம்பவ இடத்திற்கு விரைந்து சென்ற காவல்துறையினர் மற்றும் தீயணைப்புவீரர்கள் முத்துராமலிங்கத்தின் சடலத்தை கைப்பற்றி பாளையங்கோட்டை அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர் விசாரணை நடத்தி வருகின்றனர்.