வீட்டின் பூட்டை உடைத்து தங்க நகைகளை திருடி சென்ற மர்ம நபர்கள் குறித்து காவல்துறையினர் விசாரணை மேற்கொண்டு வருகின்றனர்.
திருச்சி மாவட்டத்தில் திருவெறும்பூர் அருகிலுள்ள பாய்லர் ஆலையில் பொறியாளராக அருண்குமார் என்பவர் பணிபுரிந்து வருகிறார். இவர் தனது மனைவி மற்றும் தாயுடன் ஆலை குடியிருப்பில் வசித்து வருகிறார். இந்நிலையில் அருண்குமாரின் குடும்பத்தினர் மானாமதுரையில் நடைபெற்ற உறவினர் ஒருவரின் இறுதி சடங்கில் பங்கேற்பதற்காக சென்றுள்ளனர். இதனையடுத்து திரும்பி வந்து பார்த்தபோது வீட்டின் முன்புற கதவு உடைக்கப்பட்டிருந்ததை கண்டு அருண்குமார் அதிர்ச்சி அடைந்தார்.
அதன்பின் உள்ளே சென்று பார்த்தபோது பீரோவில் இருந்த 23 பவுன் தங்க நகைகள் மற்றும் வெள்ளி பொருட்கள் போன்றவற்றை மர்மநபர்கள் திருடி சென்றது தெரியவந்துள்ளது. மேலும் இச்சம்பவம் குறித்து அருண்குமார் காவல்துறையினருக்கு தகவல் அளித்துள்ளார். அந்த தகவலின் பேரில் பாய்லர் ஆலை காவல்துறையினர் சம்பவ இடத்திற்கு விரைந்து சென்று பார்வையிட்டுள்ளனர். இதனையடுத்து வழக்குப்பதிவு செய்த காவல்துறையினர், அந்த திருட்டு சம்பவத்தில் ஈடுபட்ட மர்ம நபர்களை தீவிரமாக தேடும் பணியில் ஈடுபட்டுள்ளனர்.