காளையின் உருவம் செதுக்கப்பட்டு கிடக்கும் கல்லை தொல்லியல் துறையினர் ஆய்வு செய்ய வேண்டும் என புராதன ஆர்வலர் கோரிக்கை விடுத்துள்ளார்.
திருப்பூர் மாவட்டத்தில் உள்ள எரகாம்பட்டியிலிருந்து சந்திராபுரம் செல்லும் சாலையோரத்தில் ஒரு வேப்பமரம் உள்ளது. இந்த மரத்தடியில் 10 அடி நீளமும், 2 அடி அகலமும் உடைய நடுக்கல் பல ஆண்டுகளாக கிடைக்கிறது. இந்நிலையில் காளையின் உருவம் செதுக்கப்பட்டுள்ள அந்த கல்லில் செவ்வக வடிவத்தில் கோடுகளும், எழுத்துக்களும் உள்ளன.
இதுகுறித்து சந்திராபுரம் பகுதியில் வசிக்கும் புராதன ஆர்வலர் பாலு என்பவர் கூறும்போது, சடையபாளையம், செங்காளிபாளையம், சந்திராபுரம் போன்ற பகுதிகளில் உள்ள கிணறுகளை தோண்டும் போது முதுமக்கள் தாழிகள் கண்டெடுக்கப்பட்டுள்ளன. இந்த கல்லில் திமிலுடன் கூடிய காளையின் உருவம் பொறிக்கப்பட்டுள்ளது. எனவே இந்த கல்லை தொல்லியல் துறையினர் ஆய்வு செய்ய வேண்டுமென அவர் கோரிக்கை விடுத்துள்ளார்.