ஆடுகளை திருடிய 2 மர்ம நபர்களை காவல்துறையினர் கைது செய்துள்ளனர்.
திருநெல்வேலி மாவட்டத்திலுள்ள இளங்கோ நகர் பகுதியில் மாயாண்டி என்பவர் வசித்து வருகிறார். இவர் விவசாயம் செய்து வருகிறார். இந்நிலையில் மாயாண்டி தனது வீட்டில் சொந்தமாக ஆடுகளை வளர்த்து வருகிறார். அந்த ஆடுகளை அதே பகுதியில் உள்ள வயல்வெளியில் வழக்கம் போல் மேய்ச்சலுக்கு அனுப்பியுள்ளார். அப்போது மேய்ச்சலுக்கு அனுப்பிய ஆடுகளில் 2 ஆடுகளை 2 மர்ம நபர்கள் லோடு ஆட்டோவில் ஏற்றியுள்ளனர். இதனைப் பார்த்து அதிர்ச்சியடைந்த மாயாண்டி அப்பகுதியில் உள்ள பொதுமக்களின் உதவியுடன் அந்த மர்ம நபர்களை கையும் களவுமாக பிடித்து பாளையங்கோட்டை குற்றப்பிரிவு காவல் நிலையத்தில் ஒப்படைத்தார்.
இது குறித்து வழக்குப்பதிவு செய்த காவல்துறையினர் அவர்களிடம் விசாரணை நடத்தினர். அந்த விசாரணையில் அவர்கள் ராஜவல்லிபுரம் வ.உ.சி. நகர் பகுதியில் வசிக்கும் மணிகண்டன் மற்றும் செந்தில்வேல் முருகன் என்பதும் அவர்கள் ஆடுகளை திருட முயற்சி செய்ததும் காவல்துறையினருக்கு தெரியவந்துள்ளது. இதனைத் தொடர்ந்து காவல்துறையினர் 2 பேரையும் கைது செய்ததோடு அவர்கள் ஆடுகளை திருட பயன்படுத்திய ஆட்டோவையும் பறிமுதல் செய்துள்ளனர்.