நாகை மாவட்டம் அக்கரைப்பேட்டை உள்ள திடீர் குப்பம் பகுதியில் சிவகுமார்(48) என்பவர் வசித்து வருகிறார். இவரது சகோதரர் சிவனேசன்(42). இவர்களுக்கு சொந்தமான விசைப்படகுகளில் அக்கரைப்பேட்டை, சாமந்தன் பேட்டை, ஆயர் நாட்டு தெரு மற்றும் மயிலாடுதுறை மாவட்டம் சந்திரப்பாடி, மற்றும் தரங்கம்பாடி ஆகிய பகுதிகளில் உள்ள மீனவர்கள் 23 பேர் கடந்த 11ம் தேதி நாகை துறைமுகத்தில் இருந்து மீன்பிடிக்க கடலுக்கு சென்றனர்.
இதையடுத்து அவர்கள் புதன்கிழமை இரவு இலங்கை பருத்தித்துறைக்கு தென் கிழக்கே நாட்டிக்கல் மைல் தொலைவில் மீன்பிடித்துக் கொண்டிருந்தபோது இலங்கை கடற்படையினர் அவர்களை கைது செய்தனர். அதன் பிறகு அவர்களை இன்று காலை காரைநகர் துறைமுகத்துக்கு கொண்டு சென்று கொரோனா பரிசோதனை மேற்கொள்ளப்பட்டது. அதன் பிறகு அவர்களை யாழ்ப்பாணம் மீன்வளத் துறையிடம் ஒப்படைக்கப்பட்டு விசாரணை செய்து வருகின்றனர்.