சடலமாக தொங்கிய வாலிபரின் விவரம் குறித்து காவல்துறையினர் விசாரணை மேற்கொண்டு வருகின்றனர்.
திருச்சி மாவட்டத்திலுள்ள திருவெறும்பூர் ரயில் நிலையம் வழியாக சென்னை, மயிலாடுதுறை, மன்னார்குடி, குடந்தை, தஞ்சாவூர் போன்ற ஊர்களுக்கு செல்லும் ரயில்கள் சென்று வருகிறது. இந்நிலையில் அங்குள்ள நடைமேடையில் இருக்கும் ஒரு கம்பத்தில் 27 வயது மதிக்கத்தக்க வாலிபர் ஒருவர் தூக்கில் சடலமாக தொங்கிக் கொண்டிருந்தார். இதனை கண்டு பயணிகள் அதிர்ச்சி அடைந்து திருவெறும்பூர் ரயில் நிலைய அதிகாரிகளுக்கு தகவல் தெரிவித்துள்ளனர். அவர்கள் திருச்சி ரயில் நிலைய காவல்துறையினருக்கு தகவல் தெரிவித்தனர்.
அந்த தகவலின் பேரில் சம்பவ இடத்திற்கு சென்ற காவல்துறையினர் அந்த நபர் யார்? எந்த ஊரைச் சேர்ந்தவர்? என்பது குறித்து விசாரணை நடத்தியுள்ளனர். அதன்பின் காவல்துறையினர் வாலிபரின் சடலத்தை மீட்டு அரசு மருத்துவமனைக்கு பிரேத பரிசோதனைகாக அனுப்பி வைத்துள்ளனர். இதுகுறித்து கூத்தைபார் கிராம நிர்வாக அலுவலர் கொடுத்த புகாரின் பேரில் ரயில்வே காவல்துறையினர் வழக்கு பதிவு செய்து அந்த வாலிபர் தற்கொலை செய்து கொண்டாரா? அல்லது கொலை செய்யப்பட்டாரா? என்பது பற்றி தீவிர விசாரணை மேற்கொண்டு வருகின்றனர்.