தமிழகத்தில் நடைபெற்ற ஊரக உள்ளாட்சித் தேர்தலில் 9 மாவட்ட ஊராட்சிக் குழுத் தலைவர் பதவிகளையும் திமுக கைப்பற்றியுள்ளது. மாவட்ட வாரியாக வெற்றி விவரங்கள்:
காஞ்சிபுரத்தில் திமுக கூட்டணி மொத்தமுள்ள 16 உறுப்பினர்களையும் வென்று உள்ளதால் திமுக வேட்பாளர் மனோகரன் போட்டியின்றி தேர்வு செய்யப்பட்டுள்ளார்.
செங்கல்பட்டில், 16 இடங்களில் திமுக 15 இடங்களிலும், அதிமுக ஒரு இடத்திலும் வெற்றி பெற்றது. இதனால் திமுக வெற்றி வேட்பாளர் செம்பருத்தி மாவட்ட ஊராட்சித் தலைவராக நியமிக்கப்பட்டார்.
விழுப்புரத்தில் 27 இடங்களை திமுக கூட்டணி கட்சியும், அதிமுக ஒரு இடத்தையும் கைப்பற்றியது. ஆகவே திமுக வேட்பாளர் ஜெயச்சந்திரன் மாவட்ட ஊராட்சித் தலைவராக தேர்ந்தெடுக்கப்பட்டுள்ளார்
கள்ளக்குறிச்சியில் 19 இடங்களில் திமுக வெற்றி பெற்றதால் திமுக வேட்பாளர் புவனேஸ்வரி பெருமாள் போட்டியின்றி தேர்ந்தெடுக்கப்பட்டார்.
வேலூரில் 14 தொகுதிகளிலும் திமுக கூட்டணி வெற்றி பெற்றது. இதனால் மாவட்ட பஞ்சாயத்து தலைவராக திமுக வேட்பாளர் எம்.பாபு தேர்வு செய்யப்பட்டார்.
திருப்பத்தூரில் திமுக 13 இடங்களில் வெற்றி பெற்றதால், திமுக உறுப்பினர் சூர்யகுமார் போட்டியின்றி தேர்ந்தெடுக்கப்பட்டார்.
ராணிப்பேட்டையில் மொத்தமுள்ள 13 இடங்களில் திமுக வெற்றி பெற்றதால் ஜெயந்தி மூர்த்தி போட்டியின்றி தேர்வு செய்யப்பட்டார்.
தென்காசியில் திமுக 14 தொகுதிகளில் 10 இடங்களையும், கூட்டணி கட்சிகள் 4 இடங்களையும் வென்றது. இதனால் மாவட்ட ஊராட்சி தலைவராக திமுக வேட்பாளர் தமிழ்செல்வி தேர்வு செய்யப்பட்டார்.
திருநெல்வேலியில் 12 தொகுதிகளிலும் திமுக கூட்டணி வெற்றி பெற்றதால் மாவட்ட பஞ்சாயத்து தலைவராக திமுக வேட்பாளர் ஜெகதீஷ் தேர்ந்தெடுக்கப்பட்டார்.