காரில் மதுபாட்டில்களை கடத்தி சென்ற 3 பேரை காவல்துறையினர் கைது செய்து 428 மதுபாட்டில்களை பறிமுதல் செய்துள்ளனர்.
ராமநாதபுரம் மாவட்டம் ராமேஸ்வரம் துணை போலீஸ் சூப்பிரண்டு அதிகாரி தீபக் சிவாஜ் தலைமையில், தனிப்பிரிவு சிறப்பு இன்ஸ்பெக்டர், குற்றப்பிரிவு இன்ஸ்பெக்டர் மற்றும் காவல்துறையினர் ஆகியோர் எம்.ஆர்.டி நகர் அருகே உள்ள தனுஷ்கோடி செல்லும் சாலையில் தீவிர வாகன சோதனையில் ஈடுபட்டிருந்தனர். இந்நிலையில் அப்பகுதியாக வந்த கார் ஒன்றை நிறுத்தி சோதனை செய்துள்ளனர்.
அப்போது அந்த காரில் மதுபாட்டில்கள் கடத்தி வந்தது தெரியவந்துள்ளது. இதனையடுத்து காரில் இருந்தவர்களிடம் விசாரணை நடத்தியதில் அவர்கள் ராமேஸ்வரம் மார்க்கெட் தெருவை சேர்ந்த மோகன்ராஜ், வழிவிட்டான், ரியாஸ்கான் என்பது தெரியவந்துள்ளது. இதுகுறித்து காவல்துறையினர் வழக்குப்பதிவு செய்து 3 பேரையும் கைது செய்துள்ளனர். மேலும் அவர்கள் பதுக்கி வைத்திருந்த 428 மது பாட்டில்களை பறிமுதல் செய்து விசாரணை நடத்தி வருகின்றனர்.