தடை செய்யப்பட்ட பிளாஸ்டிக் பொருட்களை விற்பனை செய்த குற்றத்திற்காக கடை உரிமையாளர்களுக்கு அபராதம் விதிக்கப்பட்டிருக்கிறது.
ராணிப்பேட்டை மாவட்டத்தில் உள்ள நெமிலி பேரூராட்சி செயல் அலுவலர் சரவணன், பனப்பாக்கம் பேரூராட்சி செயல் அலுவலர் குமார் ஆகியோரின் தலைமையில் அந்தந்த பேரூராட்சி பணியாளர்கள் உள்ளடக்கிய குழுவினர் மளிகை கடைகள், பழக்கடைகள் மற்றும் வணிக வளாகங்களில் திடீரென ஆய்வு செய்துள்ளனர். அப்போது நெமிலி பேரூராட்சியில் தடை செய்யப்பட்டிருக்கும் 250 கிலோ பிளாஸ்டிக் பொருட்கள் மற்றும் பணப்பாக்கம் பேரூராட்சியில் 50 கிலோ பிளாஸ்டிக் பொருட்களை அதிகாரிகள் பறிமுதல் செய்துள்ளனர்.
இதனை அடுத்து தடை செய்யப்பட்ட பிளாஸ்டிக் பொருட்களை விற்பனை செய்தது கண்டறியப்பட்ட காரணத்தினால் கடைகளுக்கு அபராதம் விதிக்கப்பட்டு சீல் வைக்கப்பட்டு உரிமையாளர்களுக்கு எச்சரிக்கை விடப்பட்டிருக்கிறது. இதனைத் தொடர்ந்து கொரோனா தடுப்பூசி போட்டுக் கொள்ளாத கடை உரிமையாளர்கள் மற்றும் பணியாளர்களுக்கு அதற்குரிய டோக்கன் வழங்கப்பட்டு தற்போது நடைபெறும் தடுப்பூசி முகாமில் கலந்து கொண்டு தடுப்பூசி போட்டுக் கொள்வதற்கு அறிவுறுத்தப்பட்டிருக்கிறது.