ஆஸ்திரேலிய நாட்டில் சுமார் 600 நாட்களுக்குப்பின் சர்வதேச எல்லைகள் திறக்கப்பட்டிருப்பதால் சிட்னி விமான நிலையத்தில் மக்கள் உணர்வுபூர்வமாக தங்கள் உறவினர்களை வரவேற்றிருக்கிறார்கள்.
கொரோனா தொற்றால் கடந்த வருடம் மார்ச் மாதத்தில் ஆஸ்திரேலியாவில் சர்வதேச எல்லைகள் அடைக்கப்பட்டது. மேலும், பயண விதிமுறைகளும், கடுமையாக நடைமுறைப்படுத்தப்பட்டது. உலக அளவில் கடுமையான விதிமுறைகளை நடைமுறைப்படுத்திய நாடுகளில் ஆஸ்திரேலியா முன்னிலையில் இருக்கிறது.
இது மட்டுமல்லாமல் நாட்டு மக்கள், தங்கள் பக்கத்து மாநிலங்களுக்கு செல்வதற்கும், தங்களின் குடும்பத்தினரை சந்திப்பதற்கும் முடியாத நிலை ஏற்பட்டது. இதனால் மக்கள் பலரும் அரசை விமர்சித்து வந்தனர். இந்நிலையில் சுமார் 600 நாட்கள் கடந்த பின்பு, நாட்டில் சர்வதேச எல்லைகள் திறக்கப்பட்டிருக்கிறது.
மேலும் மக்கள் தங்கள் குடும்பத்தினரை சந்திக்க அனுமதி வழங்கப்பட்டிருக்கிறது. பல்வேறு மக்கள் தங்கள் பிள்ளைகளையும், குடும்பத்தினரையும் கடந்த ஒரு வருடமாக சந்திக்காமல் தொலைபேசி மற்றும் இணைய வழியாகவே உரையாடி வந்தனர். தற்போது விதிமுறைகள் தளர்த்தப்பட்டது குறித்து ஒரு தந்தை கூறுகையில், சுமார் ஒரு வருடம் கழித்து என் மகனை சந்திக்கச் சென்றபோது விவரிக்க முடியாத அளவில் மகிழ்ச்சி அடைந்ததாக கூறியிருக்கிறார்.