டிரைவரின் கட்டுப்பாட்டை இழந்து கம்பம்மெட்டு மலைபகுதியில் லாரி கவிழ்ந்து விபத்தடைந்த சம்பவம் அப்பகுதியில் பரபரப்பை ஏற்படுத்தியுள்ளது.
தேனி மாவட்டம் கம்பம் பகுதியில் உள்ள யாதவர் தெருவில் மணிகண்டன் என்பவர் வசித்து வந்துள்ளார். இவர் சொந்தமாக லாரி வைத்து கால்நடைத் தீவனங்களை கேரள மாநிலம் இடுக்கிக்கு சவாரிக்கு கொண்டு செல்வது வழக்கம். இந்நிலையில் வழக்கம்போல கால்நடைத் தீவனங்களை ஏற்றிக்கொண்டு லாரி கம்பத்தில் இருந்து புறப்பட்டுள்ளது. இந்த லாரியை தாத்தப்பன்குளத்தை சேர்ந்த சரவணன் என்பவர் ஓட்டிச் சென்றுள்ளார்.
இந்நிலையில் கம்பம்மெட்டு மலைப்பாதையில் உள்ள 4வது கொண்டை ஊசி வளைவில் சென்று கொண்டிருந்தபோது திடீரென லாரி கட்டுப்பாட்டை இழந்துள்ளது. அப்போது அங்கிருந்த பள்ளத்தில் லாரி கவிழ்ந்து விபத்தடைந்துள்ளது. இந்த கோர விபத்தில் டிரைவர் சரவணன் அதிஷ்டவசமாக லேசான காயங்களுடன் உயிர் தப்பியுள்ளார். இதுகுறித்து தகவலறிந்து சென்ற கம்பம் வடக்கு காவல் துறையினர் வழக்குப்பதிவு செய்து விசாரணை மேற்கொண்டு வருகின்றனர்.