தமிழக வனப் பகுதிகளை 33 சதவீதமாக அதிகரிக்கும் நடவடிக்கைகள் தீவிரப்படுத்தப்பட்டு உள்ளதாக அமைச்சர் ராமச்சந்திரன் தெரிவித்துள்ளார். முன்னதாக தமிழ்நாட்டின் வனப்பகுதிகளை 33 சதவீதமாக உயர்த்துவதற்கு நடவடிக்கை எடுக்கப்படும் என்று முதல்வர் ஸ்டாலின் தெரிவித்திருந்தார். மேலும் சுற்றுச்சூழல், காலநிலை மாற்றம் மற்றும் வனத்துறை மூலம் செயல்படுத்தப்பட்டு வரும் திட்டப்பணிகள் குறித்தும் அடுத்த 10 ஆண்டுகளில் இத்துறையில் தொலைநோக்குடன் செயல்படுத்த வேண்டிய திட்டங்கள் குறித்து முதல்வர் ஸ்டாலின் கடந்த ஜூலை மாதம் தெரிவித்திருந்தார்.
மரம் நடும் திட்டத்தை தீவிரப்படுத்தி தமிழ்நாட்டின் வனபரப்பை 33 சதவீதமாக உயர்த்துவதற்கு நடவடிக்கை எடுக்க வேண்டும் என்றும், மனிதர்கள், வனவிலங்குகள் இடையே மோதலை கட்டுப்படுத்த உரிய நடவடிக்கைகளை மேற்கொள்ள வேண்டும் என்றும் முதல்வர் ஸ்டாலின் அறிவித்திருந்தார். அதன்படி தற்போது தமிழக வனப் பகுதிகளை 33 சதவீதமாக அதிகரிக்கும் நடவடிக்கைகள் தீவிரப்படுத்தப்பட்டுள்ளன என்றும், வனப்பகுதிகளில் மண்சார்ந்த மரங்களை அதிகரிக்க நடவடிக்கை மேற்கொள்ளப்பட்டு வருவதாகவும் அமைச்சர் ராமச்சந்திரன் தெரிவித்துள்ளார்.