பாம்பன் தூக்குபாலத்தில் தூண்களில் இரும்பு கம்பிகள் அமைக்கும் பணிகள் முடிவுபெறும் வரை விசைப்படகுகள், கப்பல்கள் கடந்து செல்ல தடை விதிக்கப்பட்டுள்ளது.
ராமநாதபுரம் மாவட்டம் ராமேஸ்வரம் பகுதியில் உள்ள பாம்பன் கடற்பகுதியில் புதிய ரயில் பாலத்திற்கான பணிகள் நடைபெற்று வருகிறது. இந்நிலையில் தூக்கு பாலத்தின் தூண்களில் இரும்பு கம்பிகள் கட்டும் பணிகளும் தீவிரமாக நடைபெற்று வருகின்றது. இன்னும் ஓரிரு வாரங்களில் கான்கிரீட் கலவைகள் சேர்க்கும் பணிகள் தொடங்க உள்ளதாக அதிகாரிகள் தெரிவித்துள்ளனர்.
மேலும் இந்தப் பணிகளுக்காக தூக்கு பாலத்தின் அருகே கடலுக்குள் பெரிய இரும்பு குழாய்கள் நிலை நிறுத்தப்பட்டுள்ளது. எனவே இந்த பணிகள் முடிவு பெறும் வரை பெரிய மீன்பிடி விசைப் படகுகள் மற்றும் கப்பல்கள் தூக்கு பாலத்தை கடந்து செல்வதற்கு அதிகாரிகள் தடை விதித்துள்ளனர்.