வீடுகளின் பூட்டை உடைத்து தங்க நகைகள், வெள்ளி பொருட்கள் மற்றும் மோட்டார் சைக்கிளை திருடி சென்ற 2 பேரை காவல்துறையினர் கைது செய்தனர்.
சேலம் மாவட்டத்திலுள்ள ஆட்டையாம்பட்டி பகுதியில் தொடர் திருட்டு சம்பவங்களை தடுக்க புறநகர் துணை போலீஸ் சூப்பிரண்டு தையல்நாயகி தலைமையில், இன்ஸ்பெக்டர் அம்சவள்ளி, சப்-இன்ஸ்பெக்டர் அமிர்தலிங்கம் மற்றும் காவல்துறையினர் வாகன சோதனையில் ஈடுபட்டனர். இந்த சோதனையின்போது சந்தேகப்படும்படி நின்ற 2 பேரை காவல்துறையினர் பிடித்து விசாரணை மேற்கொண்டனர். அந்த விசாரணையில் அவர்கள் திருப்பத்தூர் மாவட்டம் நாட்றம்பள்ளியை சேர்ந்த அர்ஜுனன், தர்மபுரி மாவட்டம் பென்னாகரம் பகுதியை சேர்ந்த மாதேஸ் என்பது காவல்துறையினருக்கு தெரியவந்தது. மேலும் இவர்கள் ஆட்டையாம்பட்டி பகுதியில் வீடுகளின் பூட்டை உடைத்து திருட்டு சம்பவத்தில் ஈடுபட்டதும் காவல்துறையினருக்கு தெரியவந்தது.
இதனையடுத்து அர்ஜூனன், மாதேஸ் ஆகிய இருவரையும் காவல்துறையினர் கைது செய்து தொடர் விசாரணை மேற்கொண்டனர். அப்போது கடந்த 2019-ஆம் ஆண்டு பிப்ரவரி மாதம் 10-ஆம் தேதி அர்ஜூனன், மாதேஸ் ஆகிய இருவரும் பெத்தாம்பட்டியை சேர்ந்த நல்லம்மாள் என்பவரின் வீட்டின் பூட்டை உடைத்து அங்கு பீரோவில் இருந்த 7 பவுன் நகை மற்றும் தங்க மோதிரத்தை திருடி சென்றது காவல்துறையினருக்கு தெரியவந்தது. அதுமட்டுமின்றி கடந்த செப்டம்பர் மாதம் ஆட்டையாம்பட்டி ரத்தினவேல் கவுண்டர் காட்டில் வசிக்கும் கோகிலாவின் வீட்டு பூட்டை உடைத்தும் அங்கிருந்த வெள்ளி டம்ளர், காமாட்சி விளக்குகள், கொலுசு, வெள்ளி செம்பு உட்பட 900 கிராம் வெள்ளி பொருட்கள் மற்றும் மோட்டார் சைக்கிளை இருவரும் திருடி சென்றது காவல்துறையினர் நடத்திய விசாரணையில் தெரியவந்துள்ளது.
இதனையடுத்து அவர்களிடமிருந்து 4 லட்சம் ரூபாய் மதிப்புள்ள தங்க நகைகள், வெள்ளி பொருட்கள் மற்றும் மோட்டார் சைக்கிளை காவல்துறையினர் கைப்பற்றினர். மேலும் கைது செய்யப்பட்ட அர்ஜூனன், மாதேஸ் ஆகிய இருவர் மீதும் ஆந்திர மாநிலம் மற்றும் தர்மபுரி, கடத்தூர், நாட்றம்பள்ளி, திருப்பத்தூர், ஓசூர், கிருஷ்ணகிரி போன்ற காவல் நிலையங்களில் 40-க்கும் மேற்பட்ட வழக்குகள் நிலுவையில் இருக்கிறது. இந்நிலையில் அர்ஜுனன், மாதேஷ் ஆகியோர் கைது செய்யப்பட்ட தகவலை அறிந்த நாமக்கல், கரூர் மாவட்ட காவல்துறையினர் ஆட்டையாம்பட்டி காவல் நிலையத்திற்கு விரைந்து வந்து இருவரிடமும் விசாரணை மேற்கொண்டனர்.