தமிழ்நாடு அரசு பணியாளர் தேர்வாணையம் தமிழக அரசில் காலியாக உள்ள பணியிடங்களை நிரப்ப போட்டித் தேர்வுகளை நடத்தி வருகிறது. அதன் மூலம் காலி பணியிடங்களை நிரப்புவதற்கான நபர்கள் தேர்வு செய்யப்படுகின்றனர். கடந்த ஆண்டு கொரோனா காரணமாக தேர்வுகள் நடத்தப்படாமல் இருந்தது. தற்போது கொரோனா பாதிப்பு குறைந்து வருவதை அடுத்து ஒவ்வொரு தேர்வுகளையும் டிஎன்பிஎஸ்சி அறிவித்து வருகிறது.
இந்நிலையில் தமிழ்நாடு தோட்டக்கலை சார்நிலைப் பணியில் அடங்கிய உதவி தோட்டக்கலை அலுவலர் பணியிடங்களுக்கு கடந்த பிப்ரவரி மாதம் அறிவிப்பு வெளியிடப்பட்டது. அதற்கான எழுத்து தேர்வு கடந்த ஏப்ரல் மாதம் நடத்தப்பட்டது. இதையடுத்து அதற்கான தரவரிசை பட்டியல் கடந்த செப்டம்பர் மாதம் 23 ஆம் தேதி வெளியிடப்பட்டது. தற்போது அதற்கான மூல சான்றிதழ் சரிபார்ப்பு மற்றும் கலந்தாய்வு நடைபெறும் தேதி மற்றும் அது குறித்த கூடுதல் விவரங்கள் டிஎன்பிஎஸ்சி தேர்வாணையத்தால் வெளியிடப்பட்டுள்ளது.
அதற்கான கலந்தாய்வு வருகிற டிசம்பர் 8-ஆம் தேதி தொடங்கி 10 ஆம் தேதி வரை நடைபெற உள்ளது. மேலும் இது குறித்த விவரங்கள் கலந்தாய்விற்கு தேர்வு செய்யப்பட்ட தேர்வர்களுக்கு எஸ்எம்எஸ் மற்றும் இ-மெயில் மூலம் அனுப்பப்பட்டுள்ளது. மேலும் இது குறித்த முழு விவரங்கள் அடங்கிய நுழைவு கடிதத்தினை டிஎன்பிஎஸ்சி தேர்வு அதிகாரப்பூர்வ இணையதளமான www.tnpsc.gov.in என்ற இணையதளத்தில் வெளியிடப்பட்டுள்ளது.