துக்க நிகழ்ச்சிக்கு சென்ற கிராம மக்கள்…. பள்ளத்தில் கவிழ்ந்த வேன்…. கடலூரில் கோர விபத்து…!!

வேன் பள்ளத்தில் கவிழ்ந்த விபத்தில் 29 பேர் படுகாயமடைந்த சம்பவம் பரபரப்பை ஏற்படுத்தியுள்ளது.

கடலூர் மாவட்டத்திலுள்ள ம.பொடையூர் கிராமத்தில் வசிக்கும் 20-க்கு மேற்பட்டவர்கள் ஒரு துக்க நிகழ்ச்சியில் கலந்து கொள்வதற்காக கொட்டாரம் நோக்கி வேனில் புறப்பட்டுள்ளனர். இந்த வேனை கருப்பசாமி என்பவர் ஓட்டி சென்றுள்ளார். இவர்கள் நிகழ்ச்சி முடிந்ததும் அதே வேனில் மீண்டும் ஊருக்கு புறப்பட்டுள்ளனர். இந்நிலையில் ஆவட்டி பகுதியில் சென்று கொண்டிருந்த போது ராஜி என்பவர் சாலையின் குறுக்கே நடந்து சென்றுள்ளார். அப்போது அவர் மீது மோதாமல் இருப்பதற்காக டிரைவர் வேனை திருப்பியுள்ளார். இதனால் கட்டுப்பாட்டை இழந்த வாகனம் சாலையோரம் இருந்த பள்ளத்தில் கவிழ்ந்துவிட்டது.

இந்த விபத்தில் ஓட்டுனர் கருப்பசாமி உட்பட 29 பேர் படுகாயமடைந்தனர். இதுகுறித்து தகவலறிந்த ராமநத்தம் காவல்துறையினர் சம்பவ இடத்திற்கு விரைந்து சென்று படுகாயமடைந்தவர்களை மீட்டு திட்டக்குடி அரசு மருத்துவமனைக்கு சிகிச்சைக்காக அனுப்பி வைத்துள்ளனர். அங்கு அவருக்கு தீவிர சிகிச்சை அளிக்கப்பட்டு வருகிறது. இது குறித்த புகாரின் பேரில் வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.